“Довуд ота” чегара пункти уч ойга ёпилади

Қорақалпоғистонда жойлашган “Довуд ота” (Қозоғистоннинг “Тажен”) чегара ўтказиш пункти 1 февралдан вақтинча ёпилади. Бу ҳақда Божхона қўмитаси матбуот котиби Ҳусан Тангриев маълум қилди. 

Қайд этилишича, Қозоғистон Республикасининг “Тажен” (Ўзбекистон Республикасининг “Довуд ота”) чегара ўтказиш пункти орқали шахслар, енгил автомобиллар, автобуслар ҳамда рухсат этилган тўлиқ вазни 3,5 тоннадан ошмайдиган юк автомобиллари ҳаракати 2025 йил 1 февраль санасидан бошлаб 3 ой муддатга вақтинча тўхтатилади.

“Мазкур чекловлар чегара ўтказиш пунктларида таъмирлаш ва жиҳозлаш ишлари олиб борилиши муносабати билан Қозоғистон Республикаси томонидан жисмоний шахслар ва транспорт воситаларининг хавфсизлигини таъминлаш мақсадида жорий этилмоқда”, дейилади хабарда. 

Қўмита хабарида “Тажен” (Қозоғистон) – “Довут ота” (Ўзбекистон) чегара ўтказиш пунктлари орқали ҳаракатланувчи шахслар, енгил автомобиллар, автобуслар ҳамда рухсат этилган тўлиқ вазни 3,5 тоннадан ошмайдиган юк автомобиллари “Яллама”, “Зангиота” (Навоий чегара божхона пости), “Оқ олтин” ва “Малик” ўтказиш пунктлари орқали ҳаракатланишлари сўралган. 

Қолаверса, жисмоний шахслар учун Қорақалпоғистон темирйўл ўтказиш пункти орқали йўловчи поездлари ҳаракатланишини маълум қилинган. 

“Рухсат этилган тўлиқ вазни 3,5 тоннадан ортиқ бўлган юк автомобилларининг "Тажен" (Қозоғистон) – “Довут ота” (Ўзбекистон)  чегара ўтказиш пункти орқали ҳаракати узлуксиз давом эттирилади”, дейилади расмий хабарда.

Эслатиб ўтамиз, ўтган йилнинг сентябрь ойида Қирғизистон-Ўзбекистон чегарасидаги "Қорасув" назорат-ўтказиш пункти очилишга тайёрланаётгани ҳақида хабар берилганди.