Давлат ташкилотларининг 16,4 млрд сўмлик ноқонуний харидлари аниқланди

Ўзбекистонда турли давлат ташкилотлари томонидан жами 16,4 млрд сўмлик 9 та давлат харидида қонунбузилиши ҳолатлари аниқланди. Бу ҳақда Коррупцияга қарши курашиш агентлиги хабар берди.

Ушбу давлат бюджетидан “пулни силлиқ” олишга уринган ташкилотлар орасида илм маркази ҳам, тиббиёт клиникаси ҳам ва хатто маданият мактаби ҳам бор. Маълум қилинган “қора” ҳарид суммаларининг чўнтак эгалари эса ҳали очиқланмаган.

Агентликка кўра, “Андижанпетро” МЧЖ буюртмачилигида 9,4 млрд сўмлик ва “Олмалиқ кон-металлургия комбинати”АЖ буюртмачилигида 654,2 млн сўмлик давлат харидларида “Давлат харидлари тўғрисида”ги қонуннинг қатор талабларга зид равишда ўзаро аффилланган шахслар иштирок этишига йўл қўйилган.

Шунингдек:

• Фан Олимпиадалари маркази буюртмачилигидаги 2,1 млрд сўмлик;
• “Бекобод овқатлантириш комбинати” МЧЖ буюртмачилигидаги 1,6 млрд сўмлик;
• Хоразм ихтисослаштирилган санъат мактаб-интернати буюртмачилигидаги 1,1 млрд сўмлик;
• Тошкент шаҳар 7-сон клиник шифохонаси буюртмачилигидаги 396,5 млн сўмлик;
• Бухоро давлат педагогика институти академик лицейи буюртмачилигида 308,59 млн сўмлик;
• “Ўзтрансгаз” АЖ буюртмачилигида 221,1 млн сўмлик;

Избоскан туман 15-Давлат ихтисослаштирилган мактаб интернати буюртмачилигида ўтказилган 100 млн сўмлик давлат харидларида соҳага оид қонунчилик талабларига зид равишда баҳолаш жараёнида қонунбузилишига ҳамда иштирокчилар ўртасида рақобатни чеклаш ҳолатларига йўл қўйилган.

Аниқланган қонунбузилиши ҳолатлари юзасидан юборилган агентликнинг тақдимномалари билан харид комиссиясининг ғолибни аниқлаш ҳақидаги баённомалари бекор қилингани ва ўрганиш жараёнида тўпланган ҳужжатлар қонуний чора кўриш учун ҳуқуқни муҳофаза қилувчи органларга юборилган.

Эслатиб ўтамиз, аввалроқ “Ўзбекистон темир йўллари” тизимидаги тендерларда 21 млрд сўмлик қонунбузилишлар аниқланиб, улар юзасидан тегишли чоралар кўрилгани ҳақида хабар берилган эди.

Ойбек Рустамов