Давид Силва 3 йиллик танаффусдан сўнг футболга қайтди

Испания терма жамоаси билан 2010 йилги Жаҳон чемпионати ғолиби бўлган ярим ҳимоячи Давид Силва футболга қайтди. 40 ёшли футболчи Гонконг Премьер-лигаси вакили “Ша Тин” клуби билан шартнома имзолади. Бу ҳақда клуб матбуот хизмати хабар берди.

Шартнома шартлари ошкор қилинмаган. Бироқ келишув қисқа муддатга мўлжаллангани маълум қилинди.
Силва 2020 йилдан 2023 йилгача “Реал Сосьедад” сафида тўп тепган ва шундан сўнг футболчилик фаолиятини якунлашга қарор қилган эди. Унга қадар испаниялик футболчи “Манчестер Сити” ва “Валенсия” клубларида ўйнаган. Шунингдек, “Сельта Виго” ва “Эйбар”да ижара асосида фаолият юритган.

Силва “Манчестер Сити” билан Англия Премьер-лигасида тўрт марта, Англия Кубогида икки марта, Лига Кубогида беш марта ва Суперкубокда уч марта ғолиб чиққан. Шунингдек, “Валенсия” билан Испания Кубогида икки бор чемпион бўлган. Испания терма жамоаси билан эса 2010 йилги Жаҳон чемпионати ҳамда 2008 ва 2012 йиллардаги Европа чемпионатларида ғолиб чиққан.

Маълумот учун, Давид Силва Испания терма жамоаси сафида жами 125 та учрашувда майдонга тушиб, 35 та гол урган ва 32 та голли узатмани амалга оширган.