Чирчиқда автобусда эркак вояга етмаган қизга шаҳвоний шилқимлик қилди

Тошкент вилоятининг Чирчиқ шаҳрида автобусда вояга етмаган қизга шилқимлик қилган эркак 10 суткага қамалди. QALAMPIR.UZ суд ҳужжати билан танишди. 

Суд маълумотига кўра, эркак жорий йилнинг 31 январь куни “Тошкент–Чирчиқ” йўналишида ҳаракатланадиган 199-сонли автобусда кетаётган вояга етмаган қизга нисбатан шаҳвоний шилқимлик ҳаракатларини содир этган. Жабрланувчи қўрққан ҳолда автобусдан тушиб кетган. 
Қизнинг йиғлаб турганини кўрган фуқаролар ундан нима бўлганини сўраган. У бўлган воқеани айтиб бергач, атрофдагилар эркакни ушлаган. Шунда эркак жамоат жойида бақир-чақир қилиб, жанжал кўтарган, қолаверса воқеа жойига келган ички ишлар органлари ходимларининг қонуний талабларини бажармаган.

Суд мажлисида эркак айбини қисман тан олиб, шаҳвоний ҳаракатлар содир этмаганини билдирган. Бироқ жабрланувчи кўрсатмалари, гувоҳлар кўрсатмалари ҳамда иш материаллари билан унинг айби тасдиқланган.

Эркак Маъмурий жавобгарлик тўғрисидаги кодекснинг 41-1-моддаси 1-қисми (шаҳвоний шилқимлик қилиш), 183-моддаси (майда безорилик) ва 194-моддаси (Ички ишлар органлари ходимининг қонуний талабларини бажармаслик) 1-қисмида назарда тутилган ҳуқуқбузарликларни содир этган деб топилган.

Суд қарорига кўра, унга жами 10 сутка маъмурий қамоқ жазоси ва 2 060 000 сўм жарима тайинланган. 

Эслатиб ўтамиз, аввалроқ Фарғона вилоятининг Сўх туманида қўшни аёлга Телеграм мессенжери орқали турли хил уятли гаплар ёзиб, унга шаҳвоний шилқимлик қилган 19 ёшли йигит 5 суткага қамалганди.