Чиқиндидан қарздор 200 мингга яқин фуқаронинг электрга тўлов қилиши чекланди

Ўзбекистонда чиқинди хизматидан қарздор 198 минг 858 та абонентнинг электр тўловига вақтинча чеклов ўрнатилди. Бу ҳақда Чиқиндиларни бошқариш ва циркуляр иқтисодиётни ривожлантириш агентлиги хабар берди.

Маълум қилинишича, агентлик жорий йилнинг 5 февраль ҳолатига кўра, республика бўйича чиқинди хизматидан қарздорлигини қопланмаган умумий 108,9 млрд сўм дебитор қарздорлик учун жами 1 млн 174 минг 686 та абонент “Ҳудудий электр тармоқлари” АЖнинг 2100 қисқа рақамидан SMS хабарнома орқали огоҳлантирилган. Шундан сўнг абонентларга мавжуд қарздорлигини бартараф этиш учун 5 (беш) кун муддат берилган ва ушбу даврда 12,7 млрд сўмлик тўловлар амалга оширилган.

Ҳозирда республика кесимида қопланмай қолган умумий 15,8 млрд сўм маиший чиқинди хизмати қарздорлиги учун жами 198 минг 858 та абонентнинг электр энергияси учун тўловига чеклов ўрнатилган.

Қўшимча қилинишича, мазкур чеклов қарздорлик бартараф этилиши биланоқ дарҳол ечилади.

Маълумот учун, “Ўзбекистон Республикасининг айрим қонун ҳужжатларига чиқиндиларни тўплаш ва олиб чиқиш хизматларини кўрсатиш соҳасида тўлов интизомини мустаҳкамлашга қаратилган қўшимча ва ўзгартиришлар киритиш тўғрисида”ги қонуни билан чиқиндиларни тўплаш ва олиб чиқиш хизматлари бўйича тўлов интизоми тартибга солинган. Унга кўра, ҳар ойнинг 3-санасига қадар қарздор абонентлар тўғрисидаги маълумотлар Чиқиндиларни бошқариш агентлигининг “Тоза макон” биллинг электрон тизимидан “Ҳудудий электр тармоқлари” АЖнинг биллинг тизимига узатилмоқда. Ушбу тартиб 2025 йил 30 июнгача бўлган қарздорликларга татбиқ этилмайди. 2025 йилнинг 1 июлидан чиқинди хизматларидан шаклланган қарздорликлар учун жорий йилнинг 5 ноябридан бошлаб қўлланилмоқда.

Эслатиб ўтамиз, аввалроқ Ўзбекистонда чиқинди хизматидан қарздор 151 мингдан ортиқ абонентнинг электр тўловига вақтинча чеклов ўрнатилгани ҳақида хабар берилганди.