Чехияда отишма содир этган талаба яна бир ваҳший қотилликда гумонланмоқда

Чехиядаги Карл университетига уюштирилган ҳужумдан сўнг полиция гумонланувчининг Клановица ўрмонида икки кишини ўлдиришга алоқадорлик эҳтимолини кўриб чиқмоқда. Бу ҳақда мамлакат полицияси Х саҳифасида маълум қилди. 

Чехия полицияси Прагадаги Карл университетида содир этилган отишмани текшираётганини ва гумонланувчининг уйидан Клановица ўрмонида қўш қотилликда қўлланган қуролга мос келадиган қурол топилганини билдирди.

Чехия оммавий ахборот воситаларининг ёзишича, жорий йилнинг 15 декабрь куни 32 ёшли эркак ва унинг икки ойлик қизи ўрмонда отиб ўлдирилган.

Прага полициясининг қотиллик бўлими бошлиғи Алеш Страх университетдаги отишмада гумонланувчи Клановица ўрмонидаги қотилликда гумон қилинганлар орасида эканини маълум қилган.

Эслатиб ўтамиз, шу йилнинг 21 декабрь куни Прагадаги Карл университети биноларидан бирида талаба йигит отишма содир этганди. Оқибатда 14 киши ҳалок бўлди, 25 киши яраланди.  Шундан сўнг Чехия ҳукумати 23 декабрни отишмада ҳалок бўлганлар хотираси учун мотам куни деб эълон қилди.