Буюк кетишлар ёхуд “тозаланган” “Реал” ва Златансиз қолган футбол

Дунё футболида мухлисларни ҳайратда қолдирадиган воқеликлар содир бўлишда давом этмоқда. Бугунга келиб таниқли футболчиларнинг амалдаги клубини тарк этгани эътибор марказига чиқди.

Гап шундаки, 2022/2023 йилги мавсум якунига келиб бир қанча номдор футболчилар амалдаги жамоаларида ўйнашдан бош тортди ёки кўпроқ пул таклиф қилган бошқа клуб билан музокараларга киришди.

Араб шайхлари Месси ва Роналду тўқнашувини ўз уйида кўриш хоҳиши билан ёниб-куяётган бир вақтда, Бензема “Ал-Иттиҳод” билан шартнома имзолади.

Бунинг ортидан Саудиянинг “Ал-Ҳилол” клуби делегацияси ҳужумчи Месси билан шартнома имзолаш масаласини якунига етказиш учун Парижга етиб келди ва делегация вакиллари яқин 48 соат ичида Месси билан шартнома имзолашга умид қилмоқда. 

Қайд этиш жоиз, “Ал-Ҳилол” берган янги таклиф Мессининг отасига жуда  ёқиб тушгани аниқ. Ахир гап икки йил ичида 1,2 миллиард евро ишлаб олиш ҳақида кетмоқда. Энди Мессининг отаси Леони кўндирса бўлди.

Франциянинг ПСЖ клуби бирин-кетин катта маош оладиган футболчилардан умидини уза бошлади. Навбат 31 ёшли бразилиялик Неймарга етиб келди. Шартномаси 2025 йилгача мўлжалланган Неймар клуб билан хайрлашиш ниятида эканини айтди. 

Таниқли инсайдер Экрем Конурнинг маълум қилишича, бразилиялик футболчи фаолиятини Англия Премьер-лигасида давом эттиришни режалаштирмоқда.

Саудия клубларидан бирининг 400 миллион евролик таклифини узил-кесил рад этган футболчига бунга қадар “Манчестер Сити”, “Манчестер Юнайтед”, “Челси” ва “Ньюкасл” қизиқиш билдирган. Жамоаларнинг вакиллари эса трансфер масаласини муҳокама қилишга тушган.

Шунингдек, жорий мавсум охирида шартномаси ўз ниҳоясига етадиган испаниялик 37 ёшли футболчи Серхио Рамос ПСЖдан кетади. Бу ҳақда Франция клуби расмий саҳифасида маълум қилди.

Журналист Фабрицио Романонинг таъкидлашича, Саудия лигаси клублари эркин агентга айланадиган Рамосга яхшигина таклиф билан чиққан. 

Саудиялик “овчилар” келаси мавсумни кўзлаган мақсадларига эришган ҳолда бошлайдиган бўлса, ҳар бир юлдуз ўйинчи учун сарфланган пуллар 10 баравари билан футболка бизнеси ортидан шайхлар чўнтагига қайтади.

Испаниялик ярим ҳимоячи Марко Асенсио ҳам “Реал Мадрид”ни бу ёзда эркин агент сифатида тарк этади. Бу ҳақда “қаймоқранглилар” раҳбарияти расмий саҳифасида маълум қилди.

“Қироллик клуби”  испанялик футболчини қолишга кўндирмоқчи бўлди, аммо Асенсио ўйинни ўтириб томоша қилишни ёқтирмаслигини билдирди. Мисол учун у фаолияти давомида бўлиб ўтган “Эл-класико”ларда умумий ҳисобда 1080 дақиқани захира ўриндиғида ўтказган. 

Шу вақтга қадар Асенсиога “Челси”, “Ливерпуль” ва “Астон Вилла” клублари қизиқиш билдирган. Унинг ўзи эса аллақачон ПСЖ билан оғзаки шартномага эришиб улгурган.

Ла Лиганинг 38-турида “Реал Мадрид” ва “Атлетик” беллашувида пеналтидан гол киритган Бензема бу клуб учун сўнгги совғаси эканини айтиб, жамоа ва мухлислар билан хайрлашди. 

“Футбол Златандан истеъфога чиқди”. Швециялик 41 ёшли футболчи Златан Ибрагимович ҳамма каби бошқа клубга эмас, балки оиласи бағрига трансферни амалга оширди. 

Кеча, 4 июнь куни тунда Италия А Сериясининг 38-турида “Милан” “Верона” клубини 3:1 ҳисобида мағлубиятга учратди. Ўйин якунланганида Ибрагимович мухлислари билан хайрлашди.

У ҳеч қачон ўз услубидан четга чиққан эмас. Хайрлашув нутқида ҳам “Ҳайқиришда давом этинглар, сизнинг энг катта ютуғингиз бугун мени кўриб турганингиз”, дейди Ибрагимович.

Маълумот учун, “қария” фаолияти давомида 511 та гол урган, 2 марта Нидерландия, 7 марта Италия, 4 марта Франция ва 1 марта Испания чемпиони бўлган. 

Ҳақиқатдан ҳам чиройли якун, ажойиб кетиш. Чунки бир футболчи майдонда нималар қилиши мумкин бўлса, Ибрагимович ундан ортиғини бажарди. У футболга кириб келганда туғилганлар ҳозирда Ла Лига ва АПЛни гуллатиб юрибди.

Муҳсинжон Умурзоқов