Buyuk Britaniya milliy xavfsizlikka tahdidlar ro‘yxatini yangiladi

Buyuk Britaniya yaqin yillarda davlat duch kelishi mumkin bo‘lgan tahdidlarning yangi ro‘yxatini e’lon qildi. Bu haqda hukumat saytida chop etilgan hujjatda yozilgan.

Tahdidlarning yangi ro‘yxati 89 ta bandni, jumladan, Ukrainadagi mojaro bilan bog‘liq holda Yevropaga elektr energiyasi yetkazib berishdagi uzilishlar, suv osti telekommunikatsiya kabellariga hujumlar, shuningdek, sun’iy intellekt texnologiyalaridan foydalanish bilan bog‘liq muammolarni o‘z ichiga oladi.

Buyuk Britaniyaning milliy xavfsizligiga eng ko‘p kutilgan tahdidlar qatoriga terroristik hujumlar, moliyaviy sektorning muhim infratuzilmasidagi nosozliklar, tabiiy ofatlar, Buyuk Britaniyaning NATOga a’zo bo‘lmagan ittifoqchisiga uchinchi tomonning hujum qilishi, jamoatchilik hayotiga suiqasdlar kiradi. Bu risklarning barchasi, Britaniya rasmiylariga ko‘ra, yuqori ehtimolga ega – 25% dan ortiq.

Hujjatda aytilishicha, britaniyaliklar uchun eng zararli ta’sir yangi pandemiyadan kelib chiqishi mumkin. Tahlilchilarning fikricha, pandemiya oqibatlari uzoq yillar davom etadi. Biroq hodisalarning bunday rivojlanish ehtimoli nisbatan past - 5 dan 25% gacha.

“Financial Times” nashrining yozishicha, Britaniya hukumati 2020 yildan beri birinchi marta tahdidlar ro‘yxatini yangilagan. 

Ma’lumot uchun, xavf hisoboti birinchi marta Britaniya hukumati tomonidan 2008 yilda nashr etilgan. Unda tahdidlar uchta asosiy ko‘rsatkich bo‘yicha baholanadi: halok bo‘lganlar, jarohatlanganlar soni va mumkin bo‘lgan iqtisodiy xarajatlar hajmi. Shu bilan birga, yangi hujjatda qayd etilishicha, hukumat har qachongidan ham ko‘proq ma’lumotlarning sirini ochgan.