Бухорода 4 киши бир аёлни “самосуд” қилди (видео)

Бухорода уч аёл ва бир эркак олдиндан келишмовчилиги бўлган аёлнинг уйига кириб, уни “самосуд” қилди. Бу ҳақда вилоят Ички ишлар бошқармаси хабар берди.

Маълум қилинишича, Когон тумани “Туткунда” маҳалласида уч нафар аёл ва бир эркак ўзаро олдиндан тил бириктириб, шу маҳаллада яшовчи ўзларига олдиндан таниш бўлган аёлнинг уйига киришган.

Улар аёл билан олдиндан бўлган келишмовчиликни рўкач қилиб, уни ётоқхонасига олиб киришган ва сочларини кесиб ташлашган.

Бундан ташқари, улар “самосуд” жараёнини телефонда видеога олиб, интернетда тарқатиш билан қўрқитишган.

Суд-тиббий экспертизасининг хулосасига кўра, аёл енгил турдаги тан жароҳати олган. Тезкор тадбир давомида жиноий гуруҳ аъзолари қўлга олинган. Мазкур ҳолат юзасидан Жиноят кодексининг тегишли моддалари билан жиноят иши қўзғатилган. Ҳозирда дастлабки тергов ҳаракатлари олиб борилмоқда.

Эслатиб ўтамиз, аввалроқ Сурхондарёда аёл бир неча аёллар томонидан “самосуд” қилинганди.