Бугун U-20 Ўзбекистон терма жамоаси Осиё кубогидаги юришини бошлайди

Кеча, 12 февраль куни Хитой яшил майдонларида 20 ёшгача бўлган футболчилар ўртасида Осиё кубоги баҳслари старт олди. Бугун, 13 февраль куни Ўзбекистон терма жамоаси ҳам турнирдаги иштирокини бошлайди.

“C” гуруҳидан ўрин олган Фарҳод Нишонов шогирдлари дастлабки турнида яманлик тенгқурлари билан баҳс олиб боради. Учрашув Тошкент вақти билан 14:15 да бошланиши режалаштирилган.

Гуруҳдаги иккинчи ўйинда Эрон ва Индонезия жамоалари куч синашади. Ўйин 16:30 да бошланади.

Қайд этиш жоиз, Ўзбекистон терма жамоаси турнирнинг амалдаги ғолиби ҳисобланади. 2023 йил Тошкентда ўтган турнир финалида мезбонлар Ироқ терма жамоасини кичик ҳисобда таслим этиб, қитъа чемпиони бўлган.

Маълумот учун, Хитойда ўтказилаётган ҳозирги мусобақа кейинги йил Чили мезбонлик қиладиган Жаҳон чемпионатига йўлланмани тақдим этади. Қитъа биринчилигининг 4 та ярим финалчиси кичик мундиал иштирокчисига айланади.