Британияда Фаластин тарафдорларига жиноятчи мақоми берилди

Жорий йилнинг 5 июль куни Буюк Британия пойтахти Лондонда Palestine Action  ҳаракатининг тарафдорлари бу ҳаракатнинг тақиқланишига қарши норозилик билдирди ва парламент биноси яқинида ўтказилган акция вақтида бир неча фаоллар полиция томонидан қўлга олинди. Бу ҳақда “The Guardian” хабар берди.

Қайд этилишича, Palestine Action ҳозирда Буюк Британияда тақиқланган ташвиқотлар рўйхатига киритилган ва уни очиқча қўллаб-қувватлаш жиноят ҳисобланади. 

Мамлакат Ички ишлар вазири Иветт Купер таклифи билан Palestine Action Россиядаги Рус императорлик ҳаракати ва АҚШдаги неонацист гуруҳ Буюк Британияда расман тақиқланганлар рўйхатига киритилган. 

Бу қарор парламентнинг иккала палатаси томонидан қўллаб-қувватланган. Энди бу ташкилотларга аъзолик, уларнинг йиғилишларида қатнашиш ёки ҳар қандай шаклда уларни қўллаб-қувватлаш жиноят ҳисобланади ва бунинг учун 14 йилгача озодликдан маҳрум қилиш жазоси белгиланган. 

Palestine Action ҳаракати 20 июнь куни Буюк Британиянинг Оксфордшир графлигидаги Брйз-Нортон ҳарбий авиабазасига бостириб кириб, икки таъминот самолётига зарар етказган эди. 

Ҳаракат вакиллари бу ҳолатни Ғазода Исроил томонидан олиб борилаётган уруш ва геноцидга қарши норозилик дея изоҳлаган. Уларнинг айтишича, Британия ҳукумати бу можаро доирасида ҳарбий юкларни етказиб беришда, разведка самолётларини Ғазо устида учиришда ва АҚШ ҳамда Исроил самолётларига ёнилғи қуйишда бевосита иштирок этмоқда. 

Эслатиб ўтамиз, аввалроқ Трамп Исроил 60 кунлик вақтинчалик ўт очишни тўхтатишга рози бўлганини билдирган эди. Шу давр мобайнида Ғазодаги ҳарбий можарони бутунлай якунлашга қаратилган қадамлар ташланиши режалаштирилган.

Исроил Бош вазири Биньямин Нетаньяху ҳозирча Трампнинг баёнотига очиқ изоҳ бермаган. Бироқ “Reuters” таҳлилига кўра, Тель-Авив ва ҲАМАСнинг расмий риторикаси ҳануз кескин ва муросасизлигича қолмоқда. Нетаньяху бир неча бор ҲАМАСни қуролсизлантириш тинчликка эришиш учун мажбурий шарт эканини таъкидлаган. Бироқ тахминларга кўра, ҳануз 20 га яқин гаровдагиларни ушлаб турган ҲАМАС бу мавзуни муҳокама қилишдан бош тортмоқда.

Ғазо секторидаги қуролли можаролар 2023 йилнинг октабр ойида ҲАМАС аскарларининг Исроил ҳудудига ҳужуми ортидан бошланган эди. 2024 йил январь ойида томонлар икки ойга чўзилган вақтинчалик сулҳга эришган. 18 март куни эса Исроил армияси Ғазодаги ҳарбий амалиётларни қайтадан бошлаган ва уларни кенгайтирган.