Исроил Ғазода 60 кунлик оташкесимга рози бўлди – Трамп

АҚШ Президенти Дональд Трамп Қўшма Штатлар вакиллари Исроил билан Ғазо секторида 60 кунлик ўт очишни тўхтатиш бўйича шартларни келишиб олганини маълум қилди. Бу ҳақда у ўзининг Truth Social тармоғидаги саҳифасида ёзди.

“Исроил 60 кунлик ўт очишни тўхтатиш учун зарур бўлган шартларга рози бўлди. Шу вақт ичида биз барча томонлар билан урушни тугатиш йўлида ишлаймиз. Қатарликлар ва мисрликлар – тинчлик ўрнатиш йўлида жуда кўп ҳаракат қилган давлатлар бу якуний таклифни тақдим этади”, деб ёзди Трамп.

У, шунингдек, “Яқин Шарқ манфаати йўлида” ҲАМАС ушбу битимни қабул қилишига умид билдирган.

“Негаки, бундан яхшироғи бўлмайди, фақат ёмонлашади”, дейди у.

Қайд этиш жоиз, Ғазода ҳарбий ҳаракатлар 2023 йил октябрда яна бошланган эди. 2024 йил январда томонлар икки ой давом этган вақтинчалик сулҳга келишган. 18 март куни Исроил армияси Ғазога яна зарба берган. Апрель ойида АҚШ Президентининг махсус вакили Стив Уиткофф сулҳни баъзи гаровдагиларни озод қилиш эвазига узайтиришни таклиф қилган эди. Исроил бу таклифни қабул қилган, бироқ ҲАМАС рад этган. Шундан сўнг Исроил армияси Фаластинда ҳарбий амалиётларни кенгайтирди.

Эслатиб ўтамиз, аввалроқ Дональд Трамп Оқ уйда журналистлар билан учрашувда Ғазо секторида сулҳга эришиш ушбу ҳафтадаёқ амалга ошиши мумкинлигини айтганди.