Британиялик UFC чемпиони ўз унвонидан воз кечди

Британиялик аралаш яккакураш (MMA) устаси Том Аспиналл кўзидаги муаммолар сабаб UFC оғир вазн тоифасидаги чемпионлик унвонидан воз кечди. Бу ҳақда у ўзининг Instagram саҳифасида маълум қилди.

Жангчи жарроҳлик амалиётидан ўтиши кераклигини айтди. У сентябрь ойида октагонга қайтишни режалаштирган эди, аммо ҳали тиббий рухсат олмаган.

“Мен бир нечта операцияни бошдан кечирдим, жароҳатлар олдим ва инфекцияларга дуч келдим. Мусобақаларга қайтиш учун қўлимдан келган барча ишни қилдим. Жанг санасини белгилаб, спарринг машғулотларини ҳам давом эттираётгандим. Ўзимни жуда яхши ҳис қилдим ва жангга тайёр эдим. Аммо тасодифан яна ўнг кўзимни жароҳатлаб олдим”, дейди Аспиналл.

Унинг қўшимча қилишича, тикланиш учун қанча вақт керак бўлиши ҳозирча номаълум. Бироқ Аспиналл MMA фаолиятини якунлаш нияти йўқлигини таъкидлади.

Аспиналл 2023 йил ноябрь ойидан буён UFC оғир вазн тоифасида вақтинчалик чемпион бўлиб келган. Жон Жонс 2025 йил июнь ойида фаолиятини якунлаганидан сўнг, UFC Аспиналлни тўлиқ чемпион сифатида тасдиқлаган.

Маълумот учун, Аспиналл профессионал фаолиятида 15 та ғалаба ва 3 та мағлубият бор. У UFC’даги сўнги жангини 2025 йил октябрь ойида ўтказган.