Британия минглаб аскарини узоқ муддатга Украинага юбормоқчи

Буюк Британия ҳукумати минглаб ҳарбийларини Украинага жўнатишни режалаштирмоқда. Уларнинг вазифаси Москва ва Киев ўртасидаги эҳтимолий сулҳни назорат қилиш бўлади. Бу ҳақда Буюк Британия ҳукуматидаги юқори мартабали манбага таяниб, “The Times” нашри хабар берди.

“Бу узоқ муддатли мажбурият бўлади, гап йиллар ҳақида кетмоқда. Сулҳ битимини сақлаб қолиш ва Россияни тийиб туриш учун қанча вақт керак бўлса, шунча давом этади”, деди манба.

“The Times” хабарига кўра, Буюк Британия ўз ҳарбийларини Украинага Франция, Туркия, Канада ва Австралия билан бирга юбориш ҳақида келишиб олган. Яна 30 дан ортиқ давлат ушбу миссияни қурол ва моддий-техник ёрдам билан қўллаб-қувватлашга рози бўлган. Жами 30 минггача тинчликпарвар ҳарбийлар Украинага жўнатилиши мумкин.

Бироқ ушбу контингент фақат Москва ва Киев ўртасида тинчлик шартномаси имзолангандан кейин Украинага киритилади. Россия эса НАТО давлатларининг ҳарбийларини Украинада жойлаштиришга кескин қарши чиқмоқда.

“Бу гап-сўзлар мутлақо ноўрин ва бемаънидир. Агар улар у ерда пайдо бўлса, бу уларнинг тўғридан тўғри можарога аралашганини англатади. Бу эса барча оқибатлари билан бирга уруш иштирокчисига айланиш деганидир”, деди Россия Ташқи ишлар вазири ўринбосари Александр Грушко.

Унинг сўзларига кўра, фақатгина қуролсиз кузатувчилар жойлаштирилиши мумкин ва улар тинчлик битими бажарилишини назорат қилиш билан шуғулланиши керак.

Эслатиб ўтамиз, аввалроқ Франция Президенти Эммануэль Макрон тинчликпарвар кучларни Украинага жойлаштириш учун Россиянинг розилиги керак эмаслигини таъкидлаган эди. Унинг фикрича, тинчликпарвар кучларнинг жойлаштирилиши келажакдаги музокараларнинг муҳим қисми бўлади, чунки украиналиклар ҳеч қандай ҳудудий муросага боролмайди ва хавфсизлик кафолатисиз қолиши мумкин эмас.