Брэд Питтдан Селена Гомесгача. “Олтин глобус-2023” номзодлари эълон қилинди

Америка Қўшма Штатлари кино саноатида “Оскар”дан кейинги ўринда турувчи “Олтин глобус” тақдирлаш маросимида 27 та номинация бўйича барча номзодлар рўйхати эълон қилинди.

Эътиборлиси, мукофотнинг асосий номинацияси бўлган “Энг яхши фильм” (драма) йўналишига ҳали тақдимоти бўлиб ўтмаган “Аватар: сув йўли” (“Аватар 2”) фильми ҳам қўйилган. Ушбу номинацияда ғолиблик учун “Топ Ган: Меверик”, “Элвис”, “Фебелман” ва “Тар” фильмлари курашади.

Шунингдек, мусиқий, комедия йўналишидаги номзодлар орасида ўзбек томошабинларига “Жеймс Бонд” сифатида танилган Дэниел Крейг номзоди қўйилган. Унинг рақиблари – Диего Кальва, Адам Драйвер, Колин Фаррелл, Рэйф Файнс каби актёрлар.

Иккинчи даражадаги энг яхши актёр йўналишида эса “Вавилон” фильмидаги ижроси учун актёр Брэд Питтнинг ҳам номзоди кўрсатилган. Бу йўналишдаги бошқа номзодлар эса Брендан Глисон, Барри Кеоган, Ке Хюи Куан ва Эдди Редмэйнлардир.

Энг яхши кинорежиссёр йўналишида эса икки номдор режиссёрлар Жеймс Кэмерон (“Аватар 2”) ва Стивен Спилберг (“Фабелман”) номзоди қўйилган. Уларга Дэниел Кван ва Дэниел Шайнерт, Баз Лурман ҳамда Мартин Макдонахлар рақиблик қилади. 

Энг яхши хорижий фильм йўналишидаги беш кинодан иккитаси осиёлик ижодкорлар томонидан яратилган. Булар: Жанубий Кореянинг “Кетиш қарори”, Ҳиндистоннинг “РРР” фильми. Қолаверса, “Аргентина 1985”, “Яқин” (Бельгия) ва “Ғарбий фронтда ўзгариш йўқ” (Германия) фильмлари нуфузли мукофот учун курашади.

Мусиқали комедия – сериаллардаги энг яхши телеактриса йўналишида эса Селена Гомес номзоди қўйилган. Хонандага “Бир бинодаги қотиллик” телесериалидаги роли учун мукофотни қўлга киритишида Квинта Брансон, Кейли Куоко, Женна Ортега ва Жин Смарт ҳалал бериши мумкин.

Ўз вақтида “Пушти пантера” ва “Келиннинг отаси” каби фильмлари билан танилган актёр Стив Мартинга яна омад кулиб боққан кўринади. У ҳам “Бир бинодаги қотиллик” телесериалидаги роли учун мусиқали комедия йўналишидаги сериалларнинг энг яхши телеактёри номинациясига номзод бўлган. Билл Хейдер, Дональд Гловер, Мартин Шорт ва Жереми Аллен Уайт каби актёрлар номзоди бор.

“Олтин глобус” мукофоти билан тақдирлаш маросими 2023 йилнинг 10 январь куни Калифорниянинг Беверли-Хиллз шаҳридаги “Беверли Хилтон” меҳмонхонасида бўлиб ўтади.

Маълумот ўрнида, 1944 йилда Голливуд хорижий матбуот ассоциацияси томонидан асос солинган “Олтин глобус” мукофотининг тақдирлаш маросими 2023 йилда 80-маротаба ўтказилади.