Болтон: “Венесуэлада генераллар мухолифат билан музокаралар олиб боряпти”

АҚШ президентининг миллий хавфсизлик бўйича маслаҳатчиси Жон Болтон Венесуэла ҳарбийлари мухолифат билан музокаралар олиб бораётганини маълум қилди. Бу ҳақда “Fox News” телеканали хабар берди.

“Николас Мадурони қўллаб-қувватлаётган асосий генераллар, етакчи шахслар мухолифат билан доимий мулоқотда бўляпти”, деган Болтон.

Трампнинг маслаҳатчиси Венесуэлада генераллар сони 2 минг нафар эканини, айнан шу ҳол коррупцияга йўл очишини айтган.

Мадуро эса АҚШдан мамлакатини тинч қўйишни талаб қиляпти.

“Дональд Трамп Венесуэладан қўлингни торт. Шунда Венесуэла гуллаб-яшнайди”, деган у.

Эслатиб ўтамиз, Венесуэлада Хуан Гуайдо ўзини вақтинча президент вазифасини бажарувчи деб эълон қилди. АҚШ, Канада ва Лотин Америкасининг қатор ривожланган мамлакатлари Гуайдони президент сифатида тан олди.
 
Россия, Беларусь, Боливия, Эрон, Хитой, Куба, Никарагуа, Сальвадор ва Туркия Мадурони қўллаб-қувватлади. БМТ Бош котиби Антонио Гутерриш инқирозни ҳал қилиш учун томонларни мулоқот ўтказишга чақирди.

Швеция, Дания, Буюк Британия, Испания, Австрия, Нидерландия, Германия ва Франция Гуайдони 4 февраль куни тан олди.