Болтиқ денгизида кетма-кет 3-кабель узилиши содир бўлди

Швецияга тегишли Готланд ороли яқинида Болтиқ денгизида яна бир кабель узилиши юз берди. Бу ҳақда қироллик қирғоқ қўриқлаш хизмати баёнот берди.

Қайд этилишича, Финляндиянинг Cinia телекоммуникация компанияси ушбу кабель C-Lion1 маълумот узатиш линияси бўлиб, Финляндия ва Германия ўртасида жойлашганини тасдиқлади. Ушбу кабель ўтган йили 25 декабрь ва 18 ноябрь кунлари ҳам бошқа жойларда шикастланган эди. Янги ҳодиса юзасидан Марказий криминал полиция ҳамда прокуратура тергов бошлаган.

Швеция Бош вазири Ульф Кристерссон мазкур вазиятдан хабардор эканини билдирар экан, бу масала билан шуғулланаётган мутасадди идоралар ҳукуматни доимий равишда хабардор қилиб бораётганини айтган.

“Биз Болтиқ денгизида инфратузилманинг эҳтимолий шикастланиши билан боғлиқ ҳар қандай хабарни жуда жиддий қабул қиламиз. Олдин ҳам таъкидлаганимдек, бундай ҳолатлар жиддий хавфсизлик шароитида кўриб чиқилиши лозим”, дейди Кристерссон.

C-Lion1 кабелининг 18 ноябрь кунги шикастланишида Yi Peng 3 номли Хитой кемасига шубҳа билдирилган эди. Айнан шу юк кемаси Литва ва Швеция ўртасидаги BCS East-West Interlink (18 ноябрь) ва NordBalt (14 январь) остки телекоммуникация линиялари узилишида ҳам гумон қилинмоқда. Хитой кемалар реестрига кўра, Yi Peng Ningbo Yipeng Shipping компаниясига тегишли. Marinetraffic хизмати маълумотларига кўра, кеманинг ҳаракати кузатилган бўлиб, у кузда Ўртаер денгизини тарк этиб, Болтиқ денгизи орқали Россияга йўл олган. Кейин кема Ленинград вилоятидаги Уст-Луга портида тўхтаган ва 11 ноябрда ўғитлар ортилган ҳолда ортга қайтган. 

17 ва 18 ноябрь кунлари кабель узилган жойларда айнан “Yi Peng” кемаси бўлган. Шундан сўнг, бу кема тўхтатилиб, НАТО ҳарбий кемалари томонидан Дания сув ҳудудида бир ой давомида қамалган. Бироқ 20 декабрь куни Хитой томонидан борт инспекцияси ўтказилгач, Германия, Финляндия, Дания ва Швеция вакиллари иштирокида унга денгизга қайтадан чиқишга рухсат берилган. 14 январь куни эса NordBalt кабелининг шикастланишида яна шу кема гумон қилинган.

20 февраль куни юз берган янги кабель узилиши йил бошидан бери учинчи ҳодиса бўлиб, 14 январда НАТО мамлакатлари Baltic Sentry операцияси доирасида Болтиқ денгизи ва ҳаво ҳудудида патруллашни кучайтирганига қарамай юз берди. NordBalt ҳодисасидан 12 кун ўтиб, 26 январь куни Латвия ва Швеция Венцпилс ва Готланд ўртасидаги оптик толали кабелнинг зарар кўрганини эълон қилган эди.

Бу воқеа бўйича тергов давомида Мальта байроғи остида ҳаракатланган, Болгариянинг Navigation Maritime Bulgare компаниясига тегишли “Vezhen” кемаси ҳибсга олинган. У Ленинград вилоятидаги Уст-Луга портидан Жанубий Америкага ўғит олиб кетаётган бўлган. Кейинчалик Швеция терговчилари бу кема кучли бўрон туфайли кабелни тасодифан шикастлаганини аниқлаган. Шунингдек, “Vezhen” кемаси Гонконгда рўйхатдан ўтган Hai Kuo Shipping 2015B компаниясидан ижарага олингани, бу компания эса Хитойнинг йирик давлат банки ICBC (Industrial and Commercial Bank of China) лизинг бўлими томонидан бошқарилиши ҳам аниқланган. 

Эслатиб ўтамиз, аввалроқ НАТО Бош котиби Марк Рютте Финландия пойтахти Ҳельсинкида ўтказилган матбуот анжуманида НАТО аъзо давлатларининг сувости инфратузилмасини ҳимоя қилиш мақсадида Болтиқ денгизида янги патруль операциясини ишга тушганини маълум қилган эди. Ушбу миссия доирасида фрегатлар ва денгиз патруль самолётлари жалб қилинган.