Бокснинг шов-шувли жанги расман тасдиқланди 

Шу йилнинг 8 февраль куни Лас-Вегасда биринчи ўрта вазнда WBO йўналиши чемпиони Теофимо Лопес Жамейн Ортисга қарши ўз чемпионлик унвонини ҳимоя қилади.

2023 йилнинг июнь ойида Теофимо боксдаги фаолиятини якунлаши ва чемпионлик унвонидан воз кечишини эълон қилган эди. Бироқ, кейинроқ америкалик боксни тарк этиш ҳақидаги фикрини ўзгартирди ва камарини ҳимоя қилишга тайёрлигини маълум қилди.

Бунгача Теофимо гонорар суммаси камлиги сабабли Райан Гарсия билан жанг қилиш таклифини рад этганди. 

Лопеснинг шунингдек, биринчи ўрта вазнда IBF чемпионлик камари соҳиби Сабриэль Матиас ҳамда WBO, WBA ва WBC йўналишлари бўйича ярим ўрта вазн тоифасидаги камар соҳиби Теренс Кроуфорд билан жанг ўтказиши кутилмоқда.

Лопес ўзининг сўнгги жангида британиялик Жош Тейлорни мағлуб этди. 12 раунд якунига кўра, ҳакамлар бир овоздан ғалабани америкалик боксчига берганди – 115:113, 115:113 117:111.

2022 йилнинг кузида украиналик Василий Ломаченкога ютқазган америкалик Ортис эса сўнгги жангида мексикалик Антонио Моранни мағлуб этганди.