Блинкеннинг ёрдамчиси “Чорсу”да ҳасип еди (видео)

АҚШ Давлат котибининг Жанубий ва Марказий Осиё бўйича ёрдамчиси Дональд Лу Ўзбекистонга сафари давомида Тошкент шаҳридаги “Чорсу” бозорига борди. Бу ҳақдаги видеони АҚШнинг Ўзбекистондаги элчихонаси ўзининг ижтимоий тармоқлардаги саҳифасида эълон қилди.

Видеодан кўриш мумкинки, Дональд Луга АҚШнинг Ўзбекистондаги Фавқулодда ва мухтор элчиси Жонатан Ҳеник ҳамроҳлик қилган. Улар дастлаб "Чорсу" деҳқон бозорини айланган. Видеода Дональд Лу ва Жонатан Ҳеникнинг қурут татиб кўргани ва Лу ўзбек тилида “мазза” деганини кўриш мумкин.

Шундан сўнг АҚШ расмийлари Чорсу овқат бозорига ўтган. У ерда америкалик амалдорлар ўзбек миллий таомлари, жумладан, ҳасип, норин, хоним, сомсадан  татиб кўрган. Шундан сўнг улар сотувчига ўзбек тилида “раҳмат” деб миннатдорлик билдирган.

Эслатиб ўтамиз, олдинроқ Дональд Лу Ўзбекистонга сафари давомида Ташқи ишлар вазири Бахтиёр Саидов, Ташқи ишлар вазири ўринбосари Ғайрат Фозилов, Ўзбекистон Республикаси Президенти ёрдамчиси Саида Мирзиёева билан учрашувлар ўтказганди.