Биринчи хоним қизи Саида Мирзиёева билан Парижга борди

Ўзбекистон биринчи хоними Зироат Мирзиёева тўнғич қизи – Президент ёрдамчиси Саида Мирзиёева билан бирга Парижга борди. Буни Саида Мирзиёева ижтимоий тармоқда эълон қилган суратлар тасдиқлайди.

Мирзиёевалар UNESCO бош директори Одри Азуле ҳамроҳлигида ташкилотнинг Париждаги бош қароргоҳида бўлиб ўтаётган Марказий Осиёдаги илк профессионал фотосуратчи ва кинооператор Худойберган Девоновга бағишланган кўргазмага борган. 

Ўзбекистон Маданият ва санъатни ривожлантириш жамғармаси томонидан ташкил этилган мазкур кўргазмада 34 та фотосурат намойиш этилмоқда. Кўргазма 4 апрелга қадар бўлиб ўтади.

“Биз доим жаҳон ҳамжамиятига мамлакатимизни ўзига хос ракурсларда кўрсатишга, юртимизнинг кутилмаган қирраларини намойиш этишга ҳаракат қиламиз. Ҳар бир тадбир одамларда чинакам қизиқиш уйғотади — улар Ўзбекистонни ўзлари учун янгитдан кашф этишади”, деб ёзди Саида Мирзиёева

Унинг айтишича, парижликлар улкан архивнинг бир қисми бўлган ушбу фотоколлекциядаги кўплаб суратларнинг илк томошабинига айланишади. Мазкур ноёб суратлар илгари на Ўзбекистонда, на хорижда намойиш этилган. Уларда ўтмишнинг бетакрор лаҳзалари — Хоразмнинг кундалик ҳаёти, урф-одатлари, меъморчилиги ва одамлар турмуши акс этган.

Шунингдек, UNESCO'нинг Париждаги бош қароргоҳида Ўзбекистон Республикаси ҳукумати ва UNESCO ўртасидаги келишув имзоланишига бағишланган тантанали маросим бўлиб ўтди. Унда Самарқанд расман UNESCO Бош конференциянинг 43-сессияси ўтказиладиган жой сифатида белгиланди.

“Бу биз учун катта шараф ва масъулиятдир, негаки сўнгги 40 йил давомида ушбу конференция Париждан бошқа ерда ўтказилмаган. 

Бу ижодий индустриянинг машаққатли меҳнати, халқ дипломатияси ва энг юқори даражадаги келишувлар самарасидир. Бу – жаҳон ҳамжамиятининг мамлакатимиз очиқлиги, ўзига хос анъаналари ва маданий мероси, бой тарихи, мусиқаси, адабиётига катта қизиқиши билан қараётганидан далолат.

Биз маданият ва санъат воситасида мамлакатимизни халқаро майдонда тарғиб этмоқдамиз, дунё аҳлига янада яқинлаштирмоқдамиз. Бу алоқалар бевосита иқтисодий натижаларга уланиб, қўшма лойиҳалар ва умумий ғояларга айланмоқда.

Хуш келибсан, UNESCO! Самарқандда учрашгунча!” деб ёзди Мирзиёева.

Эслатиб ўтамиз, Ўзбекистон Президенти Шавкат Мирзиёев 12 март куни Францияга давлат ташрифи доирасида БМТнинг Таълим, фан ва маданият масалалари бўйича ташкилоти (UNESCO) бош директори Одри Азулени қабул қилганди.