“Биринчи америкалик дўстим”. Си Цзиньпин Билл Гейтсни қабул қилди

Хитой Халқ Республикаси Раиси Си Цзиньпин бугун, 16 июнь куни Microsoft асосчиси америкалик ишбилармон Билл Гейтсни қабул қилди. Бу ҳақда “Зеркало недели” нашри хабар берди.

Учрашувда Си Цзиньпин Билл Гейтсни “эски дўст” деб атаган ҳамда улар Хитой ва АҚШ манфаати учун ҳамкорлик қилишларига умид билдирган. Пекиндаги учрашув чоғида Цзиньпин Билл Гейтсга уни кўрганидан хурсанд эканлигини ва бу йил учрашган биринчи америкалик дўсти эканлигини айтган.

Бу Си Цзиньпиннинг хорижлик бизнес етакчиси билан сўнгги йиллардаги илк учрашуви бўлди. 

"Мен тез-тез айтаманки, АҚШ-Хитой муносабатларининг пойдевори одамлардир. Мен Америка халқига умид қиламан. Ҳозирги глобал вазиятда биз мамлакатларимиз ва халқларимиз учун фойдали бўладиган ҳамда бутун инсониятга манфаат келтирадиган турли тадбирларни амалга оширишимиз мумкин”, деган Хитой раҳбари.

Улар бундан аввал 2015 йилда Боао форуми доирасида учрашган. Бир неча йил ўтиб учрашганидан америкалик тадбиркор жуда хурсандлигини айтиб ўтган.

“Биз ҳар доим ажойиб суҳбатлар ўтказганмиз ва бугун биз кўплаб муҳим мавзуларни муҳокама қиламиз. Сўнгги тўрт йил давомида кела олмаганимдан жуда хафа бўлдим, шунинг учун қайта келганимдан жуда хурсандман”,  дейди Гейтс.

Жорий йил бошида чегаралар очилганидан бери бир нечта компания раҳбарлари Хитойга ташриф буюрди, бироқ уларнинг аксарияти ҳукумат вазирлари билан учрашди.

2020 йил бошида Си Цзиньпин Гейтсга хат ёзиб, Гейтс жамғармасига Хитойга ёрдам беришга ваъда бергани учун, жумладан, COVID-19 га қарши курашишга 5 миллион доллар ажратгани учун миннатдорчилик билдирган эди.

Си Цзиньпин Гейтс билан учрашув чоғида Хитой “гегемонликка интилаётган кучли мамлакат” деган эски йўлдан бормаслигини, кўпинча Қўшма Штатларни гегемонликка интилаётганлигини айтиб, Пекин умумий тараққиётга эришиш учун бошқа давлатлар билан ҳамкорлик қилишини таъкидлади. 

Айтиш жоизки, 14 июнда келган Билл Гейтс ташрифи давомида Гиёҳванд моддаларни ишлаб чиқиш глобал институтида нутқ сўзлади.

Гейтснинг ташрифи АҚШ Давлат котиби Энтони Блинкеннинг дунёнинг икки йирик иқтисодиёти ва стратегик рақиблари ўртасидаги муносабатларни барқарорлаштириш мақсадида Хитойга узоқ кутилган ташрифи олдидан амалга оширилди.

Эслатиб ўтамиз, Хитой Кубадаги базасидан Америка Қўшма Штатлар ҳақида разведка маълумотларини йиғиш учун фойдаланаётгани ҳамда Вашингтон бу вазиятдан хавотирда ва унга қарши чоралар кўраётгани хабар берилганди.

Шунингдек, Хитой Ташқи ишлар вазирлиги матбуот котиби Ван Вэньбинь Хитой Европа Иттифоқини Тайвань билан ҳар қандай расмий алоқадан ўзини тийишга ва Тайвань мустақиллиги тарафдори бўлмасликка чақирган эди.

Иброҳимжон Ғаффоров