Билл Гейтс Эпштейн билан алоқалари учун узр сўради

“Microsoft” компанияси асосчиси Билл Гейтс марҳум молиячи ва жинсий жиноятларда айбланган Жеффри Эпштейн билан алоқалари сабабли Гейтс жамғармаси ходимларидан узр сўради. Бу ҳақда кеча, 24 февраль куни “The Wall Street Journal” хабар берди.

Ёпиқ эшиклар ортида ўтган учрашувда Билл Гейтс Эпштейн билан бўлган учрашувлари жамғарма обрўсига путур етказганини тан олган. Шу билан бирга, у молиячининг жиноятларига алоқаси йўқлигини таъкидлаган.

Гейтснинг айтишича, у Эпштейн билан 2011 йилда мулоқот қила бошлаган. Улар 2014 йилгача кўришиб турган. Учрашувлар Германия, Франция, Нью-Йорк ва Вашингтонда бўлиб ўтган, шунингдек, Гейтс Эпштейннинг шахсий самолётида ҳам парвоз қилган. Тадбиркорнинг собиқ рафиқаси Мелинда Френч-Гейтс 2013 йилдаёқ бу алоқалардан хавотирга тушганини билдирган.

Йиғилишда Гейтс яқинда эълон қилинган материаллардаги фотосуратларга ҳам изоҳ берган. Унда тадбиркор юзлари аэрограф билан ёпилган аёллар билан бирга тасвирланган. Гейтс бу аёллар Эпштейннинг ёрдамчилари бўлганини ва суратлар расмий учрашувлардан кейин олинганини маълум қилган.

Гейтс 2014 йилдан кейин Эпштейн билан учрашмаганини ва унинг хатларига жавоб бермаганини таъкидлаган. Жамғарма вакили Гейтс йилига икки марта ходимлар билан шундай учрашув ўтказишини ва бу сафар саволларга очиқ жавоб бериб, жавобгарликни ўз зиммасига олганини тасдиқлаган.

Маълумот учун, 2025 йил 19 декабрда АҚШ демократлари Эпштейн иши доирасида Гейтснинг ёш қизлар билан тушган фотосуратларини эълон қилган эди. Жорий йилнинг 16 февраль куни эса АҚШ Адлия вазирлиги Эпштейн иши бўйича ҳужжатларда номи тилга олинган 305 нафар таниқли шахснинг якуний рўйхатини ошкор қилди.

Унга қўшиқчилар, актёрлар, тадбиркорлар ва сиёсатчилар, жумладан, ҳужжатларда камида бир марта тилга олинган шахслар ҳам киритилган. Улар орасида Бейонсе, Брюс Спрингстин, Жей-Зи, Президент Дональд Трамп, вице-президент Жей Ди Венс ва Мишель Обама ҳам бор.

Эслатиб ўтамиз, аввалроқ Буюк Британия полицияси қирол Чарлз III нинг укаси, собиқ шаҳзода Эндрюни Жеффри Эпштейн билан алоқалари сабаб ҳибсга олганди.