“Бенфика” президенти “Реал” ходими билан жанжаллашди

Лиссабоннинг “Бенфика” клуби президенти Руй Кошта Чемпионлар лигаси плей-оффининг биринчи ўйини якунлангач, “Реал Мадрид” ходими билан жанжаллашиб қолди. Бу ҳақда “Cope” хабар берди.

Манбаларга кўра, жанжал иккала томондан ҳам ҳақоратли сўзлар билан кечган ва учрашув расмийларини ажратишга тўғри келган.

Ўйинда ҳам муаммолар юзага келди. 50-дақиқада Винисиус Жуниор гол урди ва бу голни провокацион тарзда нишонлади. Бу дастлаб португалиялик клуб мухлисларининг норозилигига сабаб бўлди. Майдон марказидан тўпни ўйинга киритишдан олдин, Жуниор бош ҳакам Франсуа Летексьега қараб “Бенфика” ярим ҳимоячиси Жанлука Престианнига ишора қилди. Ҳакам ўйинни тўхтатди ва ирқчилик ҳаракати бўлиши мумкинлигини билдирувчи имо-ишора қилди.

Ўйин тўққиз дақиқадан сўнг қайта бошланди. Мазкур ҳолат юзасидан UEFA текширув бошлади. Ушбу учрашув 1:0 ҳисобида якунланди, ягона голга Винисиус Жуниор муаллифлик қилди. 

Маълумот учун, ушбу жамоалар ўртасидаги жавоб учрашуви жорий йилнинг 25 февраль куни Мадрид шаҳридаги “Сантьяго Бернабеу” стадионида бўлиб ўтади.