Беларусга жўнатилган украиналик етим болалар ғойиб бўлмоқда

Украинанинг Россия томонидан аннекция қилинган ҳудудларидан болалар таътил пайтида Беларусдаги соғломлаштириш лагерларига жўнатилади. Бироқ уларнинг ҳаммаси ҳам ортга қайтмайди. Бу ҳақда Беларуснинг мухолифатдаги Инқирозга қарши халқ маъмурияти раҳбари Павел Латушко "Дождь" телеканалига берган интервьюсида айтиб ўтди.

“Сўнгги маълумотлар Украинанинг босиб олинган ҳудудига қайтмаган етим болаларга тегишли. Улар ғойиб бўлди. Энди биз уларнинг қаердалиги ҳақида маълумот бера олмаймиз”, дейди Латушко.

Мухолифатдаги сиёсатчига кўра, ҳуқуқ ҳимоячилари Беларусга олиб кетилган украиналик болаларни юзларидан аниқлайди. Бугунги кунгача улар 16 нафар украиналик етим болалар ҳақида маълумот тўплаган.

“Аммо бу ҳали бошланиши. Афсуски, улар икки юз нафарга етиши мумкин”, дейди Латушко.

Украин болаларининг Беларусь оромгоҳларига жўнатилиши

Аннекция қилинган ҳудудларнинг Россия томонидан тайинланган ҳокимиятлари меҳрибонлик уйларидаги етим болаларни реабилитация қилиш учун Беларусга олиб кетилаётганини даъво қилмоқда.

Июнь ойида Россия ва Беларусь иттифоқ давлати котиби Дмитрий Мезенсев тан олинмаган Донецк ва Луганскдан 2000 дан ортиқ болалар ота-оналари ёки васийларининг розилиги билан Минск вилоятидаги санаторийга дам олишга кетганини айтган эди.