Latviya Rossiyaga turistik safarlarni taqiqlamoqchi

Latviya hukumati o‘z fuqarolarining Rossiya va Belarusga sayyohlik safarlarini taqiqlash niyatida. Riga buni latviyaliklarning ushbu mamlakatlarda huquqlari buzilishining oldini olish va ularni josus sifatida yollashga yo‘l qo‘ymaslik maqsadi bilan izohlamoqda. Bu haqda “Politico” xabar berdi.

Qayd etilishicha, Latviya parlamenti bugun, 14 fevral kuni mamlakatdagi turistik agentliklarning Rossiya va Belarus hududida xizmat ko‘rsatishini taqiqlash qarorini qabul qilgan. Cheklov Latviya hududida ro‘yxatdan o‘tgan barcha turizm xizmatlari taqdim etuvchilariga taalluqli bo‘lib, u Rossiya va Belarusga qarshi sanksiyalar paketi doirasida joriy etiladi.

Nashrning yozishicha, deputatlar turizm to‘g‘risidagi qonunga kiritilgan o‘zgartirish loyihasini tegishli qo‘mitaga yuborgan.

“Biz dam olish uchun (Rossiya va Belarusga) sayohatlar davom etishini va fuqarolarimiz bilan to‘la avtobuslar ochiqchasiga Latviyani bosib olish istagini bildirgan davlatlarga jo‘nab ketishi yo‘l bera olmaymiz”, dedi hukmron “Yangi birlik” partiyasi a’zosi.

U ushbu davlatlarga sayohat qilish hozirda milliy xavfsizlik masalasi ekanini ta’kidlagan. Deputatning so‘zlariga ko‘ra, 2024 yilda Rossiya 30 nafar Latviya fuqarosini hibsga olgan. Bunday hollarda Latviya hukumatining yordam ko‘rsatish imkoniyati juda cheklangan.

Joriy yil 10 fevral kuni Latviya Ichki ishlar vaziri Rixards Kozlovskis ham fuqarolarini Rossiya va Belarusga borishdan tiyilishga chaqirgan.

“Men tushunaman, u yerda odamlarning qarindoshlari, ishlari bor, lekin bunday safarlarni iloji boricha kamaytirish kerak. Sharqiy qo‘shnilar tomonidan tahdid yuzaga kelsa, biz chegarani kunlar emas, soatlar ichida yopishimiz mumkin”, dedi u.

Kozlovskisning so‘zlariga ko‘ra, “gibrid urush sharoitida” sabotaj va tashqi aralashuv xavfi saqlanib qolmoqda. Bundan tashqari, Rossiya nazoratidagi energiya tizimidan Boltiqbo‘yi davlatlari uzilgach, bunday xavf yanada kuchaygan, biroq hozircha hech qanday hodisa yuz bermagan.

Eslatib o‘tamiz, avvalroq Latviya Mudofaa vaziri Andris Spruds Boltiqbo‘yi aholisini Rossiya va Belarusga sayohat qilishdan tiyilishga chaqirgani xabar qilingandi. Vazir mamlakatlar o‘rtasidagi munosabatlar to‘liq yakunlanmagani uchun aholidan Rossiya va Belarusga borishdan tiyilishini so‘ragan.