Бектемир Мелиқўзиев WBA’дан чемпионлик жангини талаб қилди (видео)

Ўзбекистонлик профессионал боксчи Бектемир Мелиқўзиев WBA йўналиши бўйича чемпионлик жанги ўтказишни талаб қилди. Бу ҳақда спортчи ижтимоий тармоқдаги саҳифасида видеомурожаат йўллаб, ташкилотнинг қароридан норозилигини билдирди.

Мелиқўзиевнинг айтишича, у бир нечта саралаш жангида ғалаба қозониб, WBA бўйича расмий мажбурий даъвогар мақомини қўлга киритган. Унинг сўзларига кўра, WBA ва Golden Boy унга навбатдаги жанги чемпионлик учун бўлишини кафолатлаган.

“Мунгияни олдинга ўтказишим эвазига кейинги жангим чемпионлик жанг бўлишига ваъда беришган. Ҳозир эса у WBA рейтингида ҳатто кучли 15 таликка кирмаган боксчига қарши жангга тайёрланмоқда. Биз қоидаларга амал қиламиз, меҳнат қиламиз, аммо навбат бизга келганда яна қоидалар четга сурилмоқда”, дейди Мелиқўзиев.

Боксчининг қайд этишича, у WBA санкцияси остида 12 та жанг ўтказган ва тўртта саралаш баҳсида ғалаба қозонган. Мелиқўзиев амалдаги чемпион Хайме Мунгия билан жанг қилишни энг мантиқий вариант деб ҳисобламоқда.

“Мунгия чемпион, мен эса мажбурий даъвогарман. Биздан олдин ҳеч ким турмаслиги керак. Мунгия билан жангимиз ҳақиқий томошабоп ва муросасиз баҳс бўлади, деб ўйлайман. Бу жанг Мексика ва Ўзбекистон бокс мактаблари ўртасидаги катта қарама-қаршилик бўлиши мумкин”, дейди ўзбекистонлик боксчи.

Мелиқўзиев шунингдек, “Канело – Мбилли” жанги кечасида Мунгияга қарши чемпионлик баҳси ўтказиш идеал вариант бўлишини айтган.

“Мен барча жангчиларни ҳурмат қиламан, аммо энди навбат менга келди. Кўп йиллик меҳнатим эвазига бу имкониятга лойиқман”, дея таъкидлаган Мелиқўзиев.

Маълумот учун, Мелиқўзиев WBA рейтингининг биринчи поғонасидан жой олган. Ўзбекистонлик боксчи сўнгги жангида ганалик Сена Агбекони техник нокаут билан мағлуб этиб, WBA қитъалараро чемпионлик камарини муваффақиятли ҳимоя қилганди.