Байден Россияда қамоқда бўлган Гершковичнинг оиласи билан учрашди
Олам
−
30 Апрель 2023
5251АҚШ Президенти Жо Байден 29 апрель куни Россияда жосусликда айбланиб, ҳибсга олинган “The Wall Street Journal” газетаси мухбири Эван Гершковичнинг қариндошлари билан учрашди. Бу ҳақда Оқ уй матбуот хизмати хабар берди.
Унга кўра, АҚШ Президенти Жо Байден ва мамлакат биринчи хоними Жилл Байден Эван Гершкович оиласи билан норасмий учрашувда қатнашган. Америка раҳбари хусусан, журналист Элла Милман ва Михаил Гершковичнинг ота-онаси, шунингдек, унинг синглиси Даниэль Гершкович билан учрашган.
Оқ уй матбуот хизмати, шунингдек, Байден ва унинг рафиқаси ўша куни америкалик баскетболчи Бритни Гринер ва унинг рафиқаси Шерел билан учрашганини қўшимча қилган. Грейнер Россияда гиёҳванд моддалар контрабандаси учун судланган эди. 2022 йилнинг декабрида спортчи Москва ва Вашингтон ўртасида қурол савдосида айбланиб, АҚШда қамоқ муддатини ўтаётган россиялик Виктор Бутга алмашиш келишуви натижасида АҚШга қайтарилган.
Эслатиб ўтамиз, Россия Федерал хавфсизлик хизмати Гершковични Америка томонининг кўрсатмаси асосида Россия ҳарбий-саноат мажмуаси корхоналаридан бирининг фаолияти тўғрисида давлат сирини ташкил этувчи маълумотларни тўплаганликда айблаб, ҳибсга олган эди. Унга қарши Россия Федерацияси Жиноят кодексининг 276-моддаси (жосуслик) бўйича иш қўзғатилган эди. WSJ ва АҚШ ҳукумати бу айбловларни рад этган, давлат департаменти эса Россиядаги Америка фуқароларини мамлакатни тарк этишга чақирди. 2 апрель куни эса АҚШ Давлат котиби Энтони Блинкен Россия Ташқи ишлар вазири Сергей Лавров билан телефон орқали гаплашиб, журналистни озод этишни талаб қилди. 10 апрель куни АҚШ Давлат департаменти “The Wall Street Journal” мухбири Эван Гершковични ноҳақ ҳибсга олинган, деб эълон қилди ва мазкур қадам журналистни алмашиш бўйича музокаралар олиб боришга потенциал йўл очиши айтилди. Гершковичнинг айби исботланса, у Россияда 20 йилгача қамалиши мумкин.