Байден Трампга кескин айблов қўйди

АҚШнинг собиқ президенти Жо Байден амалдаги Президент Дональд Трампни кескин танқид қилиб, уни мамлакат тарихидаги “энг коррупциялашган” раҳбар деб атади. Бу ҳақда “The New York Times” хабар берди.

Байден бу баёнотни омма олдида айтган. Шунингдек, у атрофдагилар томонидан олқишланганини билдирган.

“Бу – Америка Қўшма Штатлари тарихидаги энг коррупциялашган Президент”, дейди Байден.

Шунингдек, у Трампни Капитолий воқеаларида иштирок этган шахсларга нисбатан молиявий ёрдам учун 1,8 миллиард долларлик “яширин фонд” яратганликда ҳамда криптовалюта савдосида эҳтимолий манипуляцияларда айблаган.

“Мен президент бўлган пайтимда ҳам демократиямиз хавф остида эканини айтганим учун мени танқид қилишган эди”, дейди Байден.

Унинг сўзларига кўра, Трамп “шармандали лойиҳалари” билан шуғулланмоқда ва давлат муассасаларини ўз номи билан боғлашга ҳаракат қилмоқда.

Эслатиб ўтамиз, аввалроқ АҚШ собиқ президенти Жо Байденнинг 56 ёшли ўғли Хантер Байден амалдаги давлат раҳбари Дональд Трампнинг ўғиллари – 42 ёшли Эрик Трамп ва 46 ёшли кичик Дональдни “қафасдаги жанг”га (ММА) чорлаганди. Агар ушбу жанг бўлиб ўтса (бу шубҳали бўлса-да), у 4 июль куни нишонланадиган Америка Қўшма Штатлари мустақиллигининг 250 йиллигига бағишланиши мумкин. Хантернинг тушунтиришича, унга кинорежиссёр ва журналист Эндрю Кэллахан қўнғироқ қилиб, шундай жангни ташкил этишни таклиф қилган.