БАА суди ўзбекистонликларни ўлимга ҳукм қилди – ОАВ

Ўтган йилнинг ноябрь ойида Бирлашган Араб Амирликларида яҳудий раввини Цви Коганни ўлдиришда гумон қилиниб, ушланган уч нафар ўзбекистонликни ўлимга ҳукм қилди. Бу ҳақда Исроил матбуоти хабар берди.

Қайд этилишича, ҳукм кеча, 30 март куни чиқарилган. 

Аммо ҳолат юзасидан на БАА расмийлари, на Ўзбекистон Ташқи ишлар вазирлиги муносабат билдирмади.

Ижтимоий тармоқларда эса ўлимга ҳукм қилинганлардан бирининг онаси билан суҳбати экани айтилган аудио тарқалмоқда.

Маълумот учун, раввиннинг ўлимида айбланиб, қўлга олинганлар 28 ёшли Олимбой Тоҳирович ва Маҳмуджон Абдулраҳим ҳамда 33 ёшли Азизбек Комилович экани айтилган.

Эслатиб ўтамиз, ўтган йили Ўзбекистоннинг Дубайдаги бош консулхонаси ҳамда Абу-Дабидаги элчихонаси Бирлашган Араб Амирликлари Ташқи ишлар вазирлиги ва бошқа мутасадди идоралари билан доимий алоқада бўлиб, мазкур масала юзасидан ойдинлик киритиш мақсадида тегишли ишлар олиб бораётганини билдирганди.