“Аякс” – “Гронинген” ўйини мухлислар сабаб тўхтатилди

Кеча, 30 ноябрь куни Нидерландия чемпионати доирасидаги “Аякс” ва “Гронинген” ўртасидаги учрашув бошланишидан атига олти дақиқадан сўнг “Аякс”нинг F-Side секторидаги мухлислари майдонга пиротехника отиб, икки бор тартибсизлик келтириб чиқаргани сабаб тўхтатилди. Бу ҳақда NL Times нашри хабар берди.

Манбага кўра, мухлислар салютларни яқинда вафот этган ҳамкасбларини хотирлаш учун ёққан. Бош ҳакам Бас Нейхуспо биринчи портлашлар ортидан ўйинни дарҳол тўхтатган. Узоқ танаффусдан кейин ўйин қайта бошланиши арафасида “Аякс” мухлислари яна пиротехника улоқтирган. Шундан сўнг Нейхуспо футболчилар хавфсизлигини таъминлаб бўлмаслигини айтиб, ўйинни бутунлай бекор қилишга қарор қилган.

“Агар ўз клубингизга зарар етказмоқчи бўлсангиз, бундай ишларни давом эттираверасиз. Бу шармандалик”, дея изоҳ берган бош ҳакам.

“Аякс” футболчилари ҳам мухлисларнинг хатти-ҳаракатларидан норозилигини билдирган. Клуб сардори Дэви Классен қўлларини мухлисларга қарата норози эканлигини кўрсатган.

Иккинчи ҳолатдан кейин стадион тезда бўшаб қолди, бироқ “Гронинген”нинг меҳмон мухлислари ўз жойларида қолган. Орадан кўп ўтмай “Аякс” клуб ўйин тўхтатилганини расман тасдиқлади.

Энди ҳар икки клуб Нидерландия футбол ассоциацияси (KNVB)нинг ўйин тақдирига доир қарорини кутмоқда. Учрашувнинг қолган қисми томошабинларсиз ўтказилиши мумкин.