“Астон Вилла” Европа Лигасида ғолиб бўлди

Англиянинг “Астон Вилла” футбол клуби Европа Лигаси финалида Германиянинг “Фрайбург” жамоасини мағлуб этди. Шу тариқа, бирмингемликлар ўз тарихида илк бор Европа Лигаси кубогини қўлга киритди.

Учрашув Истанбулдаги “Тупраш” стадионида бўлиб ўтди ва 3:0 ҳисоби билан якунланди. Голларга Юри Тилеманс (41-дақиқа), Эмилиано Буэндия (45+3) ва Морган Роджерс (58) муаллифлик қилди.

“Астон Вилла”ни испаниялик мураббий Унаи Эмери бошқаради. У Европа Лигасида бешинчи марта ғолиб бўлди. Шу пайтга қадар Эмери уч марта “Севилья”, бир марта “Вильярреал” ва энди “Астон Вилла” билан ушбу турнирда чемпион бўлмоқда. Шунингдек, у “Арсенал” билан ҳам финалга чиққан. Бошқа ҳеч бир мураббий Европанинг иккинчи даражали мусобақасида клуб миқёсида бу қадар кўп марта зафар қучмаган.

Бирмингем клуби тарихда илк бор Европа Лигасида ғолиб чиқди. Жамоа бунгача ҳеч қачон чорак финалдан нариги босқичга ўта олмаган эди. 1982 йилда эса, “Астон Вилла” Европа Чемпионлар Кубоги ва UEFA Суперкубогини қўлга киритган.

“Фрайбург” эса, тарихида илк бор Европа кубоги финалида ўйнади. Клубнинг аввалги энг яхши натижаси 2023 ва 2024 йилларда мусобақанинг 1/8 финалига чиқиш бўлган.