Аргентина Президенти тошбўрон қилинди

Аргентина Президенти Хавьер Милей Буенос-Айрес пойтахтидан жанубда жойлашган Ломас-де-Самора шаҳрида сайловолди тадбир чоғида тошбўрон қилинди. Бу ҳақда 27 август куни Аргентина давлати раҳбари матбуот котиби Мануэль Адорни Х ижтимоий тармоғида маълум қилди.

Қайд этилишича, Милей жабрланмаган, уни хавфсизлик ходимлари олиб кетишган. 

Воқеа Президентнинг синглиси ва ходими Карина Милей атрофида авж олган коррупция можароси фонида юз бергани айтилмоқда. Намойишчилар сиёсатчига ҳужум қилганда у синглиси билан машинада бўлган. Ўша машина ва унга ҳамроҳ бўлган машиналарга тошлар, ўсимликлар ва шишалар отилган.

Милей воқеа жойини тарк этгач, унинг тарафдорлари ва рақиблари ўртасида жанжал келиб чиққан. Қайд этилишича, Милей тарафдорларидан камида бир нафари қовурғасидан жароҳат олган ва уни тез ёрдам машинаси олиб кетган.

Аввалроқ Аргентинада Ногиронлик бўйича миллий агентликнинг (ANDIS) собиқ раҳбари Диего Спагнуолонинг овози эшитилган аудиоёзувлар оммага эълон қилинган эди. Унинг баёнотларига кўра, Карина Милей ногиронлар учун мўлжалланган маблағларни нотўғри ишлатиш билан шуғулланади.

Аргентина мухолифатининг таянчи ҳисобланган Ломас де Самора шаҳридаги сайловолди тадбиридаги вазият кескинлашишидан олдин Хавьер Милей Спагнуолонинг ёзувда айтган ҳамма гаплари “ёлғон” эканини айтди. У ўз ишини судда исботлашга ваъда берди.

AFP хабарига кўра, намойишчилар Аргентина президентини лаънатлаган.

“Ногиронларни талон-тарож қилиш – шармандалик”, деди намойишчилардан бири C5N телеканалида.