Арбелоа Трентга янги клуб излашни айтди – манба 

Испаниянинг “Реал Мадрид” жамоаси бош мураббийи Альваро Арбелоа клуб футболчиси Трент Александер-Арнольдга клубни тарк этиши кераклигини билдирган. Бу ҳақда “El Nacional” нашри хабар берди.

Манбага кўра, Арбелоа футболчи билан шахсан учрашиб, унга келаси мавсумда етарли ўйин амалиёти бериш ниятида эмаслигини ва янги клуб топиши лозимлигини айтган. Хабарларга қараганда, клуб раҳбарияти ҳам ёзги трансфер ойнасида Александер-Арнольдни сотиш вариантини кўриб чиқмоқда.

27 ёшли ҳимоячи ёзда “Ливерпуль” билан шартномаси якунлангач, эркин агент сифатида “Реал Мадрид” сафига қўшилган. У “қироллик клуби” сафида барча мусобақаларда 11 та учрашувда майдонга тушган, бироқ ҳозирча гол ура олмаган.

Маълумот учун, Александер-Арнольд “Ливерпуль” билан фаолияти давомида икки марта Англия Премьер-лигаси ва Англия Лигаси кубогини, шунингдек, Чемпионлар лигаси, Англия кубоги, UEFA Суперкубоги ҳамда Клублар ўртасидаги Жаҳон чемпионатида ғолиб чиққан.