Анқарада НАТО тарихидаги энг қисқа декларация қабул қилинди  

Кеча, 8 июль куни Туркия пойтахти Анқарада НАТО саммити ўз якунига етди. Альянсга аъзо мамлакатлар етакчилари чрашув якунларига кўра, бор-йўғи олтита банддан иборат декларацияни қабул қилди. Бу НАТО тарихидаги энг қисқа декларация бўлди. Бу ҳақда альянснинг расмий сайтида хабар берилди.  

Декларацияда НАТО Россияни узоқ муддатли таҳдид деб атаган, Украинага 2026 йилда 70 миллиард евро ажратишга ваъда берилган ҳамда 50 миллиард долларлик янги ҳарбий шартномалар имзолангани эълон қилинган. Шунингдек, ҳужжатда Украинанинг Шимолий Атлантика альянсига аъзо бўлиш истиқболлари ҳақида ҳеч қандай эслатма мавжуд эмас.  

Бундан ташқари, якуний ҳужжатда илк бор кейинги саммитнинг санаси ва жойи кўрсатилмаган. Матнда Туркияга меҳмоннавозлик учун миннатдорлик билдирилган ва альянс етакчиларининг навбатдаги учрашувига умид қилиниши айтилган, холос.  

Ҳужжатнинг алоҳида бўлими Яқин Шарққа бағишланган. НАТО етакчилари Эрон, уларнинг фикрича, ядровий қуролга эга бўлмаслиги кераклигини яна бир бор баён қилган, шунингдек, Теҳронни Ҳормуз бўғозида кемалар қатнови эркинлигини таъминлашга чақирган.  

Альянс давлатлари, шунингдек, европалик иттифоқчилар ва Канада 2025 йилда асосий мудофаа эҳтиёжлари учун харажатларни 139 миллиард доллардан кўпроққа оширганини маълум қилган. Саммитда, шунингдек, 50 миллиард долларлик янги ҳарбий шартномалар тузилган, НАТО давлатлари эса биргаликда ишлаб чиқариш қувватларини кенгайтириш ва мудофаа соҳасида янги технологияларни жорий этишни тезлаштиришга келишиб олган.

Эслатиб ўтамиз, аввалроқ Россия Туркияда бўлиб ўтган НАТО саммитида қабул қилинган Украинага ҳарбий ёрдам ва жамоавий мудофаа бўйича қарорларни кескин қоралаб, улар “фалокатли оқибатларга” олиб келиши мумкинлигини билдирганди.