Anqarada NATO tarixidagi eng qisqa deklaratsiya qabul qilindi  

Kecha, 8 iyul kuni Turkiya poytaxti Anqarada NATO sammiti o‘z yakuniga yetdi. Alyansga a’zo mamlakatlar yetakchilari uchrashuv yakunlariga ko‘ra, bor-yo‘g‘i oltita banddan iborat deklaratsiyani qabul qildi. Bu NATO tarixidagi eng qisqa deklaratsiya bo‘ldi. Bu haqda alyansning rasmiy saytida xabar berildi.  

Deklaratsiyada NATO Rossiyani uzoq muddatli tahdid deb atagan, Ukrainaga 2026 yilda 70 milliard yevro ajratishga va’da berilgan hamda 50 milliard dollarlik yangi harbiy shartnomalar imzolangani e’lon qilingan. Shuningdek, hujjatda Ukrainaning Shimoliy Atlantika alyansiga a’zo bo‘lish istiqbollari haqida hech qanday eslatma mavjud emas.  

Bundan tashqari, yakuniy hujjatda ilk bor keyingi sammitning sanasi va joyi ko‘rsatilmagan. Matnda Turkiyaga mehmonnavozlik uchun minnatdorlik bildirilgan va alyans yetakchilarining navbatdagi uchrashuviga umid qilinishi aytilgan, xolos.  

Hujjatning alohida bo‘limi Yaqin Sharqqa bag‘ishlangan. NATO yetakchilari Eron, ularning fikricha, yadroviy qurolga ega bo‘lmasligi kerakligini yana bir bor bayon qilgan, shuningdek, Tehronni Hormuz bo‘g‘ozida kemalar qatnovi erkinligini ta’minlashga chaqirgan.  

Alyans davlatlari, shuningdek, yevropalik ittifoqchilar va Kanada 2025 yilda asosiy mudofaa ehtiyojlari uchun xarajatlarni 139 milliard dollardan ko‘proqqa oshirganini ma’lum qilgan. Sammitda, shuningdek, 50 milliard dollarlik yangi harbiy shartnomalar tuzilgan, NATO davlatlari esa birgalikda ishlab chiqarish quvvatlarini kengaytirish va mudofaa sohasida yangi texnologiyalarni joriy etishni tezlashtirishga kelishib olgan.

Eslatib o‘tamiz, avvalroq Rossiya Turkiyada bo‘lib o‘tgan NATO sammitida qabul qilingan Ukrainaga harbiy yordam va jamoaviy mudofaa bo‘yicha qarorlarni keskin qoralab, ular “falokatli oqibatlarga” olib kelishi mumkinligini bildirgandi.