Россия НАТОнинг Украинага ёрдам ва мудофаа бўйича қарорларини қоралади

Россия Туркияда бўлиб ўтган НАТО саммитида қабул қилинган Украинага ҳарбий ёрдам ва жамоавий мудофаа бўйича қарорларни кескин қоралаб, улар “фалокатли оқибатларга” олиб келиши мумкинлигини билдирди. Бу ҳақда Россия Ташқи ишлар вазирлиги расмий баёнот элон қилди.

Вазирликнинг расмий вакили Мария Захарованинг айтишича, НАТОнинг устувор вазифалари ўзгармаган.

“Булар Европа қитъасини милитаризация қилиш, мудофаа салоҳиятини ошириш, Россия билан қуролли тўқнашувга тайёргарлик кўриш ва, албатта, Украинага ёрдам беришдир”, деган у вазирлик сайтида эълон қилинган баёнотида.

Захарова НАТО раҳбариятини масъулиятсиз қарорлар қабул қилишда ҳам айблаган.

“Афсуски, агар НАТО стратеглари бир лаҳза тўхтаб, ўйлаб кўришганида, нафақат альянс, балки бутун дунё учун фалокатга олиб келиши мумкин бўлган бундай масъулиятсиз қарорларни қабул қилмаган бўлар эдилар”, деган у.

Захарова, шунингдек, АҚШ билан унинг НАТОдаги иттифоқчилари ўртасидаги келишмовчиликлар сақланиб қолаётганини таъкидлаган.

“Бу зиддиятлар ҳеч қаерга йўқолгани йўқ. Бу фонда америкаликлар Шимолий Атлантика альянсидан кўнгли қолганини яширмаяпти”, деб айтган у.

Унинг сўзларига кўра, Гренландия масаласи ҳам Вашингтон истаган сценарий бўйича ҳал этилмаяпти.

“Шунингдек, Вашингтоннинг фикрича, АҚШга иттифоқчиларнинг ёрдами керак бўлган пайтда улар етарлича қўллаб-қувватламаганидан ҳам норозилик мавжуд”, деган Захарова.

НАТО Бош котиби Марк Рютте эса “Reuters” агентлигига берган интервьюсида АҚШ Президенти Дональд Трамп билан бошқа НАТО етакчилари ўртасидаги келишмовчиликлар альянснинг демократик кучини намоён этишини ва бу Россия Президенти Владимир Путин учун сабоқ бўлиши кераклигини айтган.

“Мен Путинга шундай деган бўлардим: сиз ҳам очиқ мулоқот қилишни кўпроқ ўрганишингиз керак”, деган Рютте.

Эслатиб ўтамиз, аввалроқ НАТО давлатлари Анқарадаги саммитда 2026 йил учун Украинага 70 миллиард евро (80 миллиард АҚШ доллари) миқдорида ҳарбий ёрдам ажратишга ваъда берганди.

Шунингдек, саммит якуний декларациясида аъзо давлатлар альянснинг 5-моддаси бўйича жамоавий мудофаа тамойилига “мустаҳкам содиқлик”ларини яна бир бор тасдиқлаган ҳамда камида 50 миллиард АҚШ долларилик янги қурол-яроғ шартномалари эълон қилинган.