Андижонда эр аёлининг бошига темир труба билан уриб, қасддан ўлдирди

Андижон вилояти Бўстон туманида эр хотинини темир труба билан бошига уриб, ўлдириб қўйди. Бу ҳақда Бош прокуратура матбуот котиби Ҳаёт Шамсутдинов QALAMPIR.UZ'га маълум қилди.

Кеча, 12 июнь кунига ўтар кечаси соат 01:30 ларда Бўстон тумани “Нурафшон” маҳалласида яшовчи 1971 йилда туғилган фуқаро И.А. турмуш ўртоғи М.А. билан оилавий келишмовчиликлар сабабли ўзаро жанжаллашиб қолган. Жанжал вақтида И.А. темир труба билан рафиқасининг бош қисмига бир неча маротаба уриб, уни қасддан ўлдирган. Шундан сўнг И.А. содир қилган ушбу ҳаракатларидан пушаймонлик билдириб, соат 04:00 ларда туман Ички ишлар бошқармасига мурожаат қилган.

Мазкур ҳолат юзасидан Бўстон туман прокурори томонидан фуқаро И.А.га нисбатан Жиноят кодексининг 97-моддаси 1-қисми билан жиноят иши қўзғатилган. У Жиноят-процессуал кодексининг 221-моддаси тартибида ушланган.

Эслатиб ўтамиз, аввалроқ Фарғона вилояти Бешариқ туманида эр хотинини бўғиб ўлдирганди. Бундан ташқари, Бухорода эркак хотинини пичоқлаб ўлдиргани, Наманганда эр аввал турмуш ўртоғини ўлдириб, сўнг ўз жонига қасд қилгани ҳақида хабар берилганди.