Алп тоғларида дунёдаги энг узун темир йўл туннели қурилмоқда (видео)

Алп тоғларида дунёдаги энг узун – 64 километрни ташкил этувчи темир йўл туннели қурилмоқда. Бу ҳақда “Euronews” хабар берди.

Ушбу туннель Австрия билан Италияни боғлайди ва Европанинг жануби билан шимолини туташтирувчи трансъевропа темир йўл йўлагининг асосий бўғинига айланади. Ерости иншоотининг узунлиги 64 километрни ташкил этади.

“Европа бу ерда қилинаётган иш билан фахрланиши мумкин. Бу барча европаликларнинг умумий меҳнатидир”, дейди лойиҳа раҳбари Себастьян Рейманн.

Қурилиш жараёнида Европанинг 11 та давлатидан мутахассислар иштирок этмоқда. Шунингдек, лойиҳага минтақанинг етакчи компаниялари жалб қилинган.

Туннель қазиш ишлари 6000 от кучига эга бўлган улкан бурғилаш машиналари ёрдамида олиб борилмоқда. Бу машиналарнинг баъзилари деярли 20 метр баландликка эга бўлиб, узунлиги юзлаб метрга етади.

Эслатиб ўтамиз, аввалроқ Финляндия пойтахти Ҳелсинки шаҳрида янги Круунувуоренсилта кўприги фойдаланишга топширилганди.