Алимент тўламагани учун қамалган эркакнинг иши қайта кўрилди

Алиментни ўз вақтида тўламагани учун қамалган эркак омбудсманга ўзига берилган жазони енгиллаштиришда ёрдам сўраб мурожаат қилди. Бу ҳақда Олий Мажлиснинг Инсон ҳуқуқлари бўйича вакили (омбудсман) маълум қилди. 

Билдирлишича, ушбу фуқаро 2023 йил ноябрда Жиноят ишлари бўйича Бекобод туман судининг ҳукмига кўра, Ўзбекистон Республикаси Жиноят кодексининг 122-моддаси 1-қисми билан айбдор деб топилиб, 1 йилга озодликдан маҳрум этилган ҳамда суд залида қамоққа олинган.

Шундан сўнг, айбланувчи алимент бўйича қарздорлигини тўлиқ қоплади ва омбудсманга ўзига тайинланган жазони енгиллаштириш юзасидан ариза киритди. Омбудсман эса ушбу ариза асосида судга хулоса киритди. Натижада Тошкент вилоят суди жиноят ишлари бўйича судлов ҳайъати кассация инстанциясининг 2024 йил 5 февралдаги ажрими билан судланувчига 2 ой 15 кун озодликдан маҳрум этиш жазоси тайинланди.
 
Маълумот учун, 2023 йилда Омбудсманга алимент ундириш бўйича 300 га яқин мурожаат келиб тушган. Бу 2022 йилнинг мос даврига нисбатан 17,8 фоизга кўп. Ушбу мурожаатларнинг ўрганилиши жараёнида хотин-қизларнинг вояга етмаган фарзандлари таъминоти учун 80 миллион 700 минг сўмлик алимент тўловларининг ундирилиши таъминланган.

Шунингдек, шундай ҳолатларда 5 нафар шахсга 15 сутка маъмурий қамоқ жазоси қўлланилган, яна 3 та ҳолатда қарздорлар жиноий жавобгарликка тортилган.

Эслатиб ўтамиз, аввалроқ Тошкент шаҳар Яшнобод туманида уч нафар хотинига фарзандлари таъминоти учун алимент тўламай юргани учун  қўлга олинган эркакнинг қарзини тўртинчи хотини тўлаганди.