Ака-ука Тейтлар суд қарорига қадар АҚШ қамоғида қолади

Эндрю ва Тристан Тейтлар Буюк Британияга экстрадиция қилинишига қарши чиқар экан, ҳозирча Майамидаги федерал қамоқхонада қолади. Судья Лорен Луи уларни гаров эвазига озод қилиш масаласи бўйича қарорни дарҳол чиқармади. Бу ҳақда “Reuters” хабар берди.

Қайд этилишича, кеча, 27 август куни Майами федерал судида бўлиб ўтган эшитувда судья ака-ука Тейтларнинг гаров эвазига озод этиш ҳақидаги илтимосини кўриб чиққан, аммо якуний қарорни кейинроқ эълон қилишини билдирган. Шу сабабли улар суд қарори чиққунга қадар федерал қамоқда қоладиган бўлди.

Маълум қилинишича, Тейтлар қўлларига кишан ва оёқларига занжир тақилган ҳолда АҚШ маршаллари томонидан суд залидан олиб чиқилган. 

Маълумот учун, ака-укалар Буюк Британия уларни экстрадиция қилишни сўраганидан кейин 18 июль куни Майамида ҳибсга олинган. АҚШ ва Британия фуқаролигига эга бўлган ака-укалар ўзларига қўйилган айбловларни инкор этмоқда. Собиқ кикбоксчилар эркаклик ва бойлик ҳақидаги қарашларини тарғиб қилувчи контенти орқали интернетда катта аудитория тўплаган. 39 ёшли Эндрю Тейт аввал ўзини аёлларга нисбатан нафрат билан муносабатда бўлувчи шахс сифатида таърифлаган.

Тейтлар интернетдаги образини ҳимоя қилди

Билдирилишича, федерал прокурорлар Тейтлар озод қилинса, жамият учун хавф туғдириши мумкинлигини билдирган. Ака-укалар судда кўрсатма берганидан сўнг прокурор Эбби Уоксман Эндрю Тейтнинг ноахлоқий мазмунидаги видеосини намойиш қилган.

“Улар аёлларга нисбатан ниҳоятда кучли зўравонликни тарғиб қилади. Бу образ эмас, уларнинг ўзи”, деган Уоксман.

Майами прокуратурасининг маълум қилишича, Тейтлар 2014 йилдан бошлаб веб-кам порнография бизнесида ишлаш учун ўнлаб аёлларни жалб қилган. Кейинчалик улар “Hustler's University” деб номланган онлайн курсларни ҳам ташкил этган.

27 август куни судда кўрсатма берган Тейт ака-укалари эса интернетдаги қўпол баёнотлари шунчаки образ эканини таъкидлаган.

“Мен буни эркакларни бефарқликдан чиқариш учун қиламан”, деган у.

38 ёшли Тристан Тейт эса акаси яратган ғайриоддий комедия контенти унинг тез тарқалишига сабаб бўлишини айтган.

“У дунёда ўзини ўйнаётган образи учун баҳоланадиган ягона инсон”, деган Тристан Тейт.

Эндрю Тейтнинг аёли ҳам судда гапирди

Қайд этилишича, Эндрю Тейтнинг фарзандларидан бирининг онаси Наташа Сесей ҳам судда кўрсатма берган. У Эндрю Тейтнинг интернетдаги баъзи провокацион баёнотлари унинг ҳақиқий шахсиятини акс эттирмаслигини айтган.

“Интернетда кўрадиган инсон билан мен таниган инсон ўртасида жуда катта фарқ бор”, деган Сесей.

У келаси ой Тейтнинг яна бир фарзандини дунёга келтиришини маълум қилган.

Прокурор Уоксманнинг саволларига жавоб берар экан, Сесей Эндрю Тейт Дубайдаги уйи, шунингдек, қимматбаҳо сумка, пойабзал ва заргарлик буюмлари учун пул тўлаганини тан олган.

Британиядаги айбловлар 7 йиллик даврни қамраб олади

Ака-ука Тейтларни Буюк Британияга экстрадиция қилиш масаласини ҳал этиш жараёни бир неча ой давом этиши мумкин. Суд ҳужжатларига кўра, Британия экстрадиция бўйича тўлиқ сўровини АҚШ Давлат департаментига 16 сентябрга қадар тақдим этиши керак.

Тейтларнинг Майамида ҳибсга олинишига Буюк Британия прокуратураси томонидан янги айбловлар қўйилиши сабаб бўлган. Улар 2010 йил июлидан 2017 йил августигача бўлган даврда 4 нафар жабрланувчига нисбатан содир этилган деб тахмин қилинаётган жиноятларда айбланмоқда.

Уларга аввал ҳам Британияда 3 нафар жабрланувчи билан боғлиқ зўрлаш ва одам савдоси айбловлари қўйилган. 2024 йилда Британия судьяси уларни ҳибсга олиш учун ордер берган, аммо Тейтлар ушбу айбловлар бўйича Британия судида ҳали суд олдига чиқмаган.

Эслатиб ўтамиз, аввалроқ Эндрю Тейт ва унинг укаси Тристан Тейт Буюк Британиянинг уларни зўрлаш, тажовуз ва жинсий эксплуатация мақсадида одам савдосига кўмаклашиш айбловлари бўйича экстрадиция қилиш талабига қарши курашар экан, АҚШдаги қамоқдан озод этилишни сўраб судга мурожаат қилишини ва уларнинг суд ишини Марко Рубио кўриши мумкинлиги хабар қилинганди.