АҚШнинг Эронга жавоб зарбаси мутлақо зарур эди – НАТО Бош котиби

НАТО Бош котиби Марк Рютте АҚШнинг Эронга қарши амалга оширган янги ҳарбий ҳужумларини “мутлақо зарур” деб баҳолади. Бу ҳақда у бугун, 8 июль куни Анқарада бўлиб ўтаётган НАТО саммитида журналистлар билан интервьюда айтди.

Кеча, 7 июль куни АҚШ ҳарбийлари Эронга қарши янги зарбалар берган ҳамда Ҳормуз бўғозида учта танкерга снарядлар билан ҳужум қилинганидан сўнг Теҳронга нефть сотишга рухсат берувчи лицензияни бекор қилганди. Бу эса аллақачон заифлашган ўт очишни тўхтатиш келишувига янада босим ўтказди.

“Агар ўт очишни тўхтатиш келишуви мавжуд бўлса ва Эрон уни амалда бузган бўлса, менимча, АҚШнинг қатъий жавоб қайтариши мутлақо зарур”, деган Марк Рютте Анқарада ўтаётган НАТО давлат ва ҳукумат раҳбарлари саммити олдидан журналистларга.

Рюттенинг айтишича, АҚШнинг НАТОга бўлган “тўлиқ содиқлиги”га шубҳа бўлиши мумкин эмас. Унинг таъкидлашича, альянс нафақат Европани, балки АҚШнинг ўзини ҳам ҳимоя қилишга хизмат қилади.

“Бироқ шу билан бирга, европаликлар ва канадаликлар ҳам мудофаа харажатларини АҚШ даражасига етказиши кутилмоқда. Менимча, бу мутлақо адолатли талаб”, деган у.

НАТО Бош котиби бу ҳолатни Трамп учун ғалаба, Путин учун эса мағлубият деб айтган. 

“Бугунги энг яхши янгилик шуки, бу катта ютуқдир. Бу Путин учун мағлубият, Президент Трамп учун эса ғалаба, чунки европаликлар ва канадаликлар айнан шуни амалга оширмоқда”, дея қўшимча қилган Рютте.

Эслатиб ўтамиз, аввалроқ НАТО етакчилари Туркиядаги саммитни ўнлаб миллиард АҚШ долларлик қийматдаги қурол-яроғ шартномаларини эълон қилиш билан бошлаган эди.