АҚШдаги авиаҳалокат: 30 нафар йўловчининг жасади дарёдан чиқарилди

Олам

image

АҚШнинг Вашингтон шаҳридаги Рональд Рейган аэропорти осмонида йўловчи самолёти Bombardier CRJ700 ҳарбий вертолёт Sikorsky H-60 билан тўқнашув оқибатида дарёга қулади. Ҳозиргача самолёт бортида бўлган 64 киши ва вертолётнинг 3 нафар экипажи аъзоларидан 30 нафарининг жасади сувдан чиқарилган. Бу ҳақда “Sky News” хабар берди.

Нашрнинг ёзишича, Вашингтон Ёнғин ва тез тиббий ёрдам хизмати раҳбари Жон Доннелли ҳодисадан кейин тирик қолганлар бўлиши эҳтимолини рад этган.

“Биз бу фожиали ҳалокатдан сўнг тирик қолганлар бор деб ўйламаймиз, аммо биз самолётдан 27 кишини ва вертолётдан битта жасадни чиқариб олдик”, деди Доннелли.

Кейинчалик Потомак дарёсидан жами 30 та жасад чиқарилгани маълум бўлди. Ҳалокат чоғида самолёт уч қисмга бўлиниб кетган. Йўловчи самолётида фигурали учиш спортчилари ва уларнинг мураббийлари бўлган. У Рейган халқаро аэропортининг 33-учиш-қўниш йўлагига қўнаётган вақтда ҳарбий вертолёт билан тўқнашган. Самолёт бортида 60 йўловчи ва 3-4 экипаж аъзоси, вертолётда эса 3 экипаж аъзоси бўлган.

ОАВда тарқалган маълумотларга кўра, самолётда 1994 йилги жаҳон чемпионлари Евгения Шишкова ва Вадим Наумов ҳам бўлган.

Ҳалокатдан кейин қутқарувчилар воқеа жойига 10 дақиқа ичида етиб борган. Ҳозирда қутқарув операциясига 300 дан ортиқ киши жалб этилган. Уларнинг айримлари қайиқларда ёрдам бермоқда, бошқалари эса сувга шўнғиб, жасадларни қидирмоқда.

Эслатиб ўтамиз, аввалроқ Ўзбекистон Республикаси Президенти Шавкат Мирзиёев ушбу фожиали авиаҳалокат оқибатида кўплаб инсонлар ҳалок бўлгани муносабати билан Америка Қўшма Штатлари Президенти Дональд Трампга таъзия мактуби йўллаган эди.


Мақола муаллифи

Теглар

АҚШ авиаҳалокат

Баҳолаганлар

0

Рейтинг

3

Мақолага баҳо беринг

Дўстларингиз билан улашинг