АҚШ Украинанинг НАТОга қўшилишига қарши чиқяпти. Нима учун?

Украинанинг можаро тугамасидан аввал НАТОга қабул қилиниши альянс ва Россия ўртасида тўғридан-тўғри тўқнашув келиб чиқиши таҳдидини келтириб чиқаради. Бу ҳақда АҚШ Президенти Жо Байден CNN телеканалига берган интервьюсида маълум қилди.

Байденнинг айтишича, альянс ичида Украинани “НАТО оиласи”га қабул қилиш бўйича якдил фикр йўқ.

“Менимча, альянсда Украинани НАТО оиласига қабул қилиш ёки қабул қилмаслик борасида ҳозир, уруш давом этаётган бир пайтда, консенсус мавжуд эмас”, дейди у.

У буни Украинанинг Россия билан можаро тугамасидан аввал НАТОга қабул қилиниши ташкилот аъзоларининг “биз ҳаммамиз урушдамиз” ва “Россия билан уруш ҳолатидамиз” деган муждани билдирганига баробар экани билан изоҳлаган. Чунки НАТО таъсис шартномасининг 5-моддасига кўра, иттифоқнинг бирор аъзосига қилинган ҳужум унинг барча 30 та аъзосига нисбатан таҳдид дея баҳоланади. Бунда Байден тушунтирганидек, АҚШ НАТО ҳудудининг “ҳар бир дюмини” ҳимоя қилишга мажбур бўлади.

Шунингдек, Байденнинг сўзларига кўра, Путин 2021 йил Женевадаги саммитда ундан Украинанинг НАТОга қўшилмаслиги бўйича кафолат сўраган, бироқ АҚШ раҳбари буни рад қилган.

“Икки йил олдин Женевада Путин билан биринчи марта учрашганимда, у шундай деганди: “мен Украина НАТОга қўшилмаслиги бўйича мажбуриятингизни олмоқчиман”. Мен айтдимки, биз бундай қилолмаймиз, бизда очиқ эшиклар сиёсати бор, ҳеч кимнинг кўксидан итармаймиз”, деди АҚШ Президенти.

Маълумот учун, Байден эртага, 9 июль куни Литванинг Вильнюс шаҳрида бўлиб ўтадиган НАТО саммитида қатнашиш учун Европага бир ҳафталик ташриф билан учиб кетади. Мазкур саммитда асосий масалалар сифатида Украина уруши ва унинг Шимолий Атлантика альянсига қўшилиши муҳокама қилиниши кутилмоқда.

Эслатиб ўтамиз, аввалроқ НАТО раҳбари Йенс Столтенберг Украина Вильнюс саммита ушбу ҳарбий блокка қўшила олмаслигини айтганди. Туркия Президенти Ражаб Тойиб Эрдўған эса Украина етакчиси Владимир Зеленский билан учрашувда Киев НАТОга қўшилишга ҳақли эканини маълум қилди.