АҚШ Шойгу ташрифидан кейин Россия ва Шимолий Кореяга санкциялар қўлламоқчи

Қўшма Штатлар Россия Мудофаа вазири Сергей Шойгунинг Шимолий Кореяга ташрифидан сўнг, Россия ва Шимолий Кореяга қарши санкциялар қўллаш имкониятини кўриб чиқиши мумкин. Бу ҳақда Давлат департаменти расмий вакили Мэтью Миллернинг сўзларини “Yonhap” агентлиги келтирмоқда.

“Албатта, Мудофаа вазири Сергей Шойгу Шимолий Кореяга таътилга борганга ўхшамасди”, дейди Америка департаменти вакили.

Унинг сўзларига кўра, Вашингтон аллақачон Пхеньянга ва ўтмишда Россияга ёрдам берган шахсларга қарши санкциялар киритган.

"Келажакда ҳам жазо чораларини кучайтиришимиз мумкин", дейди Миллер.

Аввалроқ АҚШ Давлат котиби Энтони Блинкен Россия делегациясининг Шимолий Кореяга ташрифи чоғида Мудофаа вазири Сергей Шойгу КХДР расмийлари билан Россиянинг Украинадаги ҳарбий амалиётларини давом эттириш учун қурол етказиб бериш бўйича музокаралар олиб боргани ҳақида маълум қилганди.

“Биз Россиянинг қурол-яроғни қаерда бўлишидан қатъий назар қўллаб-қувватлашга астойдил ҳаракат қилаётганини кўряпмиз. Биз буни Шимолий Кореяда ҳам, Россияни кўплаб учувчисиз учоқлар билан таъминлаган Эронда ҳам кўрамиз”, дея хулоса қилган у.

Эслатиб ўтамиз, Сергей Шойгу жорий йилнинг 26 июль куни Корея уруши тугаганининг 70 йиллигини нишонлаш учун Пхеньянга ташриф буюрди. Ташрифи давомида у Шимолий Корея етакчиси Ким Чен Ин билан ҳам учрашди. Улар биргаликда қурол-яроғ кўргазмасини томоша қилди. Шимолий Корея матбуотида Шойгу ушбу мамлакат армиясини “дунёда энг кучлиси” деб атагани тўғрисидаги хабарлар берилди.