АҚШ элчиси ўзбекистонликларни огоҳлантирди (видео)

АҚШнинг Ўзбекистондаги элчиси Жонатан Ҳеник АҚШда ноқонуний бўлиб турган ўзбекистонликларни ватанига қайтишга чақирди. Унинг бу ҳақдаги мурожаати АҚШнинг Тошкентдаги элчихонаси томонидан ижтимоий тармоқлардаги саҳифаларда эълон қилинди.

Элчининг билдиришича, сўнгги бир неча йил ичида кўплаб ўзбекистонликлар Марказий Америка ҳудудидаги хавфли йўллар орқали АҚШга кирган. Бунинг оқибатида АҚШда ноқонуний бўлиб турган тахминан минглаб ўзбекистонликлар бор.

“Очиғини айтганда, мен бу шахсларга Ўзбекистонга ўз ихтиёрлари билан қайтишни маслаҳат берардим, чунки акс ҳолда улар АҚШда қамоққа олиниши ёки депортация қилиниши мумкин”, дейди элчи.

Қайд этиш жоиз, март ойининг бошида Америка Қўшма Штатлари мамлакатда рухсатсиз бўлиб турган ўзбекистонлик муҳожирларни Панамага депортация қилаётгани ҳақида маълум қилинганди. Бунинг ортидан Ўзбекистон элчихонаси АҚШ ҳукуматига Панамага депортация қилинганлар бўйича сўров киритди.    

Кейинроқ эса АҚШ томони билан олиб борилган музокаралар натижасида Коста-Рикага юборилиши режалаштирилган, лекин Ўзбекистонга қайтиш ниятида бўлган 7 нафар ўзбекистонлик Нью-Йорк – Тошкент йўналиши бўйича Ўзбекистонга қайтарилди.

Эслатиб ўтамиз, аввалроқ Швейцариянинг Ўзбекистондаги фавқулодда ва мухтор элчиси Константин Оболенский ушбу давлатга сохта ишга таклиф қилиш ва қалбаки ишлаш рухсатномалари билан боғлиқ мурожаатлар кўпайгани сабабли огоҳлантириш билан чиққан эди. Элчи иш таклифи келиб тушса, жуда эҳтиёт бўлишни ва унинг чиндан ҳам ҳақиқийлигини текширишни, бунинг учун Швейцариядаги потенциал иш берувчи билан бевосита алоқада эканингизга ишонч ҳосил қилишни тавсия қилган.