АҚШ Дарья Дугина қотиллиги ортида Украина турганига ишонади – NYT

Америка разведка идоралари файласуф Александр Дугиннинг қизи Дарьянинг ўлдирилишига Украина ҳукуматининг айрим аъзолари томонидан рухсат берилган, деб ҳисоблайди. Бу ҳақда “The New York Times” АҚШ маъмуриятидаги манбаларга таяниб, ёзмоқда.

Нашр суҳбатдошларининг таъкидлашича, Вашингтон Дарья Дугинанинг ўлдирилишини тайёрлашда ҳеч қандай иштирок этмаган, жумладан, Киевга разведка маълумотларини тақдим этмаган. Қолаверса, АҚШ расмийлари бу операция ҳақида ҳатто олдиндан билмаган, агар билса, бунга қарши чиқарди, дея қўшимча қилган манбалар.

Жо Байден маъмурияти бундай ҳужумлар, гарчи катта рамзий аҳамиятга эга бўлса-да, жанговар ҳаракатларга бевосита таъсир қилмаслиги ва Россия ҳарбийларини Украинанинг юқори мартабали амалдорларига қарши жавоб қайтаришга ундаши мумкинлигидан хавотирда, деб ёзади NYT.

Газета манбаларининг таъкидлашича, Дугинанинг ўлдирилишидан сўнг, Қўшма Штатлар Украина ҳукуматига бу норозилик кайфиятини билдирган.

Киевда улар Дугина қотиллигига алоқадорлигини бир неча бор рад этишган. Бу ҳақда Владимир Зеленский ҳам айтиб ўтди.

Украина Президенти девони раҳбари маслаҳатчиси Михаил Подоляк “The New York Times” газетасига берган интервьюсида шундай деди: “У ёки бу давлатда уруш пайтида содир этилган ҳар қандай қотиллик қандайдир амалий аҳамиятга эга бўлиши керак. Бу тактик ёки стратегик аниқ мақсадни бажариши керак. Дугинлар кабилар Украина учун тактик ёки стратегик нишон эмас. Бизнинг Украина ҳудудида бошқа нишонларимиз бор, мен Россия қўмондонлигининг ҳамкорлари ва вакилларини назарда тутяпман, улар бизнинг разведкачиларимиз учун бу йўналишда фойдали бўлиши мумкин, аммо бу, албатта, Дугина эмас”.

Дугинанинг ўлдирилиши

Эслатиб ўтамиз, жорий йилнинг 20 август куни рус файлсуфи ва сиёсатчиси Александр Дугиннинг қизи Дарья Дугина Toyota Land Cruiser автомобилига ўрнатилган қўлбола портловчи учкуна портлаши оқибатида вафот этди. 

Ўша куни Дугина отаси билан бирга Президентнинг Маданий ташаббуслар жамғармаси, Москва вилояти Маданият ва туризм вазирлиги ҳамда Одинцово маъмурияти томонидан қўллаб-қувватланаётган “Анъана” ватанпарварлик фестивалида қатнашган. Тадбир тугагандан сўнг, Дугин ва қизи бирга кетиши керак бўлган, бироқ маълум бир сабабларга кўра, улар бошқа-бошқа машиналарда йўлга чиққан.

Тан олинмаган Донецк халқ республикаси раҳбари Денис Пушилин ўзининг Telegram'даги саҳифасида Дарья Дугинанинг ўлимида Украинани айблаб чиқди. 

Россия Федерал хавфсизлик хизматига кўра, Дарья Дугинанинг ўлдирилишини Украина махсус хизматлари тайёрлаган, ижрочи жиноятдан кейин Эстонияга қочиб кетган Украина фуқароси Наталья Вовк. 

Қотиллик содир бўлган куни Вовк ва Шабан "Анъанавий" адабий ва мусиқа фестивалида бўлишди, у ерда Дугина фахрий меҳмон сифатида иштирок этди. 21 август куни Дугина бошқарувидаги Toyota Land Cruiser Prado автомобилининг бошқариладиган портлашидан сўнг, Вовк ва унинг қизи Псков вилояти орқали Эстонияга жўнаб кетган.

Махфий хизматнинг аниқлик киритишича, Дугинанинг ўлдирилишини уюштириш ва унинг турмуш тарзи ҳақида маълумот олиш мақсадида Вовк ва унинг қизи Москвада марҳум яшаган уйда квартира ижарага олган. Жиноятчилар журналистни кузатиш учун Mini Cooper автомобилидан фойдаланган. Шу билан бирга, Россияга киришда Донецк Халқ Республикаси рақамлари ишлатилган - E982XN DPR, Москвада – Қозоғистон рақамлари 172AJD02 ва чиқишда – Украина AH7771IP.  

Президент Владимир Путин Дарья Дугинанинг оиласига ҳамдардлик мактубини йўллади ва марҳума журналистни "Жасорат" ордени билан тақдирлади.