Африка кубогидан кейин сенегаллик мухлислар очлик эълон қилди

Жорий йилнинг 19 январь куни Марокашда бўлиб ўтган Африка Миллатлар Кубоги (АFCON) финали чоғида тартибсизликларда айбланиб ҳибсга олинган 18 нафар сенегаллик футбол мухлиси суд жараёни якунига қадар очлик эълон қилди. Бу ҳақда “Al Jazeera” хабар берди. 

Адвокат Патрик Кабунинг маълум қилишича, ҳибсга олинганлар 18 январдан буён ўзларига қандай айбловлар қўйилганини билмаяпти. Улар Сенегал Марокашни мағлуб этган финал учрашувидан сўнг Работ шаҳрида қўлга олинган.

Таъкидланишича, финал ўйинининг сўнгги дақиқаларида айрим сенегаллик мухлислар майдонга бостириб киришга уринган. Сенегал футболчилари эса Марокаш фойдасига белгиланган кечиктирилган пенальтига норозилик билдириб, ўйинни қарийб 20 дақиқага тўхтатиб қўйган. Айрим мухлислар майдонга турли буюмларни улоқтирган.

Кабунинг айтишича, ҳибсга олинганлар ўзларининг судлов ҳуқуқи бузилаётганини таъкидлаб, очлик акциясини давом эттиришларини маълум қилган.

Маълумот учун, Сенегал терма жамоаси Африка Миллатлар Кубоги финалида Марокаш дарвозасига қўшимча ўн беш дақиқалик бўлимларда гол уриб, чемпионликни қўлга киритган эди.  

Эслатиб ўтамиз, аввалроқ Сенегал терма жамоаси бош мураббийси Пап Тиав Марокашга қарши Африка кубоги финал учрашувидаги хатти-ҳаракатлари учун беш ўйинга дисквалификация қилингани ва 100 минг доллар жаримага тортилгани ҳақида хабар берилганди.