“Толибон”ни огоҳлантирган БМТнинг Афғонистондаги қароргоҳига ҳужум уюштирилди

Олам 8043
image

Бирлашган Миллатлар Ташкилотининг Афғонистондаги ваколатхонасига ҳужум уюштирилди. Ҳужумда бир киши ўлдирилди ва бир қанча одам жароҳатланди. Бу ҳақда БМТнинг Афғонистондаги миссияси Матбуот хизмати хабар қилди.

“Бирлашган Миллатлар Ташкилоти Aфғонистоннинг Ҳирот шаҳридаги асосий қароргоҳига ҳужум уюштирилиши, афғон полицияси қўриқчиси ўлдирилиши ва офицер яраланишини қатъий қоралайди”, дейилади хабарда.

Дастлабки маълумотларга кўра, ваколатхонага ҳукуматга қарши кучлар ҳужум қилгани айтилмоқда.

“Комплекс жойлашган Ҳирот атрофидаги ҳудудда айни пайтда “Толибон” ва ҳукумат кучлари ўртасида жанглар давом этмоқда. Бирлашган Миллатлар Ташкилоти ҳужумнинг тўлиқ тасвирини тузишга ҳаракат қилмоқда ва бунинг учун тегишли томонлар билан алоқани сақламоқда”, дейди ваколатхона.

Таъкидланишича, объектга кириш жойлари реактив граната ва артиллерия ўқларидан ўққа тутилган. Ҳужум вақтида БМТ ходимларидан ҳеч ким жабрланмаган.

“БМТга ҳужум қилингани қайғули ва биз уни қатъий қоралаймиз. Ҳалок бўлган офицернинг оиласига ҳамдардлик билдирамиз ва ярадорларнинг тезроқ соғайиб кетишини тилаймиз. Бу ҳужумни содир этганлар аниқланиши ва жавобгарликка тортилиши керак”, деган БМТ Бош котибининг Афғонистон бўйича махсус вакили Дебора Лайонс.

БМТ, шунингдек, ваколатхонани ҳужумдан ҳимоя қилган Афғонистон мудофаа хизматлари идораси ходимларига миннатдорчилик билдирди.

Фуқаролар ва БМТ тузилмаларига ҳужум қилиш халқаро қонун билан тақиқланган ва ҳарбий жиноятларга тенг кўрилади.

Аввалроқ, БМТ “Толибон” билан музокаралар давомида натижага эришилмаса, ҳаракат халқаро даражада изоляция қилиниши ҳақида огоҳлантирганди.

Суннатилла Абдуллаев
Мақолага баҳо беринг
Баҳолаганлар: 337
Рейтинг: 2.9
t
×