Аҳмадалиевга қарши жангни интиқлик билан кутяпман – Иноуэ

Иккинчи энг енгил вазн тоифасида мутлақ чемпион, япониялик профбокс устаси Наоя Иноуэ WBA йўналиши бўйича мажбурий даъвогар ўзбекистонлик боксчи Муроджон Аҳмадалиевга қарши сентябрь ойида Японияда рингга кўтарилмоқчи. Бу ҳақда “The Ring” хабар берди.

“Сентябрь ойида Аҳмадалиевга қарши Японияда жанг қилишим керак. Буни интиқлик билан кутяпман. Чунки шундай кучли рақибларим бор экан, мен ўзимнинг энг яхши жангларимни кўрсатаман. Ўзимни нималарга қодир эканлигимни кўрсатишга интиламан. Ўйлайманки, Аҳмадалиев юқори савиядаги жангчи. Бу тўқнашувда ҳам бекорга енгилмас чемпион эканлигимни исботлайман”, дейди 31 ёшли чарм қўлқоп устаси.

Маълумот ўрнида, Иноуэ иккинчи енгил вазн тоифасида мутлақ жаҳон чемпиони ҳисобланади. У профессионал боксда 29 та жанг ўтказган ва барчасида ғалаба қозонган. Аҳмадалиев эса 14 та жанг ўтказиб, 13 ғалаба ва 1 мағлубият қайд этган.

Эслатиб ўтамиз, аввалроқ, ушбу жанг жорий йилнинг сентябрь ойида бўлиб ўтиши ва бунинг учун Иноуэ май ойдаги жангида ғалаба қозониши кераклиги ҳақида хабар берилган эди.