80 миллион йиллик улкан денгиз йиртқичининг янги тури аниқланди

Олимлар динозаврлар даврида яшаган йирик денгиз судралиб юрувчисини кашф этди ва унга Tylosaurus rex деб ном берди. Бу ҳақда “Reuters” хабар берди.

Тадқиқотчилар аввал топилган қазилма суякларни қайта ўрганиб, унинг алоҳида тур эканини аниқлаган. Олимлар унинг катта ҳажми, ўткир тишлари, кучли жағ ва бўйин мушаклари ҳамда ов қилишга мослашган танаси уни жуда кучли йиртқич бўлганини кўрсатишини айтган.

Tylosaurus rex тахминан 80 миллион йил олдин Шимолий Американинг ўша даврдаги ички денгизларида яшаган. Унинг танаси узун, тумшуғи чўзилган, оёқлари ўрнига катта сузувчи қанотлари ва кучли думи бўлган.

Олимлар бу жонзот узунлиги 13 метрга яқин бўлганини, яъни у ҳатто баъзи замонавий катта денгиз йиртқичларидан ҳам йирик бўлганини таъкидламоқда. У асосан бошқа денгиз ҳайвонлари ва йирик балиқлар билан озиқланган.

Мутахассислар уни “денгизнинг Tylosaurus rex” деб атамоқда, чунки у ўз даврида океандаги энг кучли йиртқичлардан бири бўлган.

Эслатиб ўтамиз, Буюк Британия ва Таиланд тадқиқотчилари Жануби-Шарқий Осиёда ҳозиргача аниқланган энг йирик динозавр турини топганди. Бу Nagatitan chaiyaphumensis номли улкан зауроподдир. Буюк Британия ва Таиланд тадқиқотчилари динозаврнинг янги турни Таиланднинг шимоли-шарқидаги Чайяпхум вилоятида топилган қазилма суяклар асосида аниқлаган. Олимларнинг айтишича, унинг вазни 27 тоннага етган бўлиб, бу қарийб тўққизта йирик Осиё филининг оғирлигига тенг. Динозаврнинг узунлиги эса 27 метрни ташкил этган.